కలం, వెబ్డెస్క్: ప్రతిపక్షాల తీవ్ర నిరసనల నడుమ కేంద్రం లోక్సభ (Lok Sabha)లో మూడు కీలక బిల్లులను ప్రవేశపెట్టింది. భారత లోక్సభ ట్రిబ్యునల్స్ సంస్కరణలు, ఖనిజ నిబంధనలు, కేరళ పేరు మార్పునకు సంబంధించిన బిల్లులు సభ ముందుకు వచ్చాయి. కేంద్ర మంత్రి అర్జున్ రామ్ మేఘవాల్ (Arjun Ram Meghwal) ట్రిబ్యునల్స్ రీఫార్మ్స్ బిల్లు ప్రవేశపెట్టగా, ఆ తర్వాత కేంద్ర మంత్రి కిషన్ రెడ్డి మైన్స్ అండ్ మినరల్స్ అమెండ్మెంట్ బిల్లు ప్రవేశపెట్టారు. వీటితో పాటు కేరళ పేరు మార్పునకు సంబంధించిన బిల్లు కూడా సభలో ప్రవేశ పెట్టారు.
లోక్సభ (Lok Sabha)లో ప్రవేశపెట్టిన ఈ బిల్లులపై ఎంపీలు చర్చించనున్నారు. జూలై 20న ప్రారంభమైన పార్లమెంటు వర్షాకాల సమావేశాలు ఆగస్టు 13న ముగియనున్నాయి. మొత్తం పందొమ్మిది సమావేశాలుగా జరిగే ఈ సెషన్లో, బిల్లుల ప్రవేశంతో పాటు ఫైనాన్స్, రైల్వేలు, హౌసింగ్, అర్బన్ అఫైర్స్, సోషల్ జస్టిస్ అండ్ ఎంపవర్మెంట్ వంటి వివిధ స్టాండింగ్ కమిటీల నివేదికలను కూడా సభ స్వీకరించింది.
మరోవైపు సభ జరుగుతున్న సమయంలోనే ప్రతిపక్షాల ఆందోళనలు కూడా కొనసాగుతున్నాయి. ఢిల్లీలో జంతర్ మంతర్ వద్ద విద్యార్థుల నిరసనల సమయంలో పోలీసుల దాడుల గురించి కేంద్ర హోంమంత్రి అమిత్ షా మాట్లాడాలని ప్రతిపక్ష సభ్యులు డిమాండ్ చేస్తున్నారు. అమిత్ షా పార్లమెంటులో ఈ అంశంపై స్పందించే వరకు పార్లమెంటరీ ప్రతిష్టంభన కొనసాగుతుందని కాంగ్రెస్ ఎంపీ ప్రియాంక గాంధీ వాద్రా పేర్కొన్నారు. కేసీ వేణుగోపాల్ కూడా ఇదే అభిప్రాయాన్ని వ్యక్తంచేస్తూ పారదర్శకత, జవాబుదారీతనం అవసరమని పేర్కొంటూ వాయిదా తీర్మానం సమర్పించారు.
Also Read : రాంచీలో హై టెన్షన్.. అసెంబ్లీ ముట్టడికి విద్యార్థుల యత్నం
Follow Us On: Sharechat
