కలం, ఖమ్మం బ్యూరో : భద్రాద్రి కొత్తగూడెం జిల్లా అభివృద్ధి ప్రస్థానంలో మరో విశిష్ట ఘట్టం ఆవిష్కృతమైంది. జిల్లాలో ఆస్పిరేషనల్ బ్లాక్స్ కార్యక్రమంలో భాగంగా చేపడుతున్న అభివృద్ధి కార్యక్రమాలు, వినూత్న పరిపాలనా విధానాలకు అంతర్జాతీయ స్థాయిలో గుర్తింపు లభించింది. నీతి ఆయోగ్ ఆధ్వర్యంలో అమలవుతున్న ఈ ప్రత్యేక కార్యక్రమంలో జిల్లా ప్రగతిని పరిగణలోకి తీసుకుంటూ, జిల్లా కలెక్టర్, జిల్లా మేజిస్ట్రేట్ అంకిత్ (Collector Ankit), జపాన్ అధ్యయన పర్యటనకు (Japan Study Tour) ఎంపికయ్యారు. నీతి ఆయోగ్, జపాన్ అంతర్జాతీయ సహకార సంస్థ (JICA) సంయుక్తంగా నిర్వహిస్తున్న ఆస్పిరేషనల్ డిస్ట్రిక్ట్స్ అండ్ బ్లాక్స్ అధ్యయన కార్యక్రమంలో భాగంగా నవంబర్ 15 నుంచి 21వ తేదీ వరకు కలెక్టర్ జపాన్‌లో పర్యటించనున్నారు. ఈ పర్యటనకు తెలంగాణ రాష్ట్ర ప్రభుత్వం శనివారం అధికారికంగా అనుమతి మంజూరు చేసింది.
జిల్లాలోని వెనుకబడిన ప్రాంతాల్లో అభివృద్ధి అంతరాలను తగ్గించి, ప్రజల జీవన ప్రమాణాలను మెరుగుపరచడమే లక్ష్యంగా జిల్లా యంత్రాంగం ప్రణాళికాబద్ధంగా ముందుకు వెళ్తోంది. ముఖ్యంగా విద్య, వైద్యం, గర్భిణులు-చిన్నారులకు పోషకాహారం, వ్యవసాయం, తాగునీరు, పారిశుధ్యం, మౌలిక సదుపాయాల కల్పన వంటి కీలక రంగాలపై కలెక్టర్ అంకిత్ ప్రత్యేక దృష్టి సారించారు. అభివృద్ధి సూచికల ఆధారంగా ప్రాధాన్యతలను గుర్తించడం, వివిధ శాఖలకు నిర్దిష్ట లక్ష్యాలను నిర్దేశించడం, క్షేత్రస్థాయిలో పనుల పురోగతిని సమీక్షించడం ద్వారా పాలనలో సత్ఫలితాలు సాధిస్తున్నారు.
ఈ పర్యటనలో భాగంగా జపాన్‌లో అమలవుతున్న ఆధునిక అభివృద్ధి నమూనాలు, అధునాతన సాంకేతిక పరిజ్ఞానం, సమర్థవంతమైన పరిపాలనా వ్యవస్థలు, ప్రజాకేంద్రిత సేవలు, స్థానిక స్థాయి అభివృద్ధి ప్రణాళికలను కలెక్టర్ అధ్యయనం చేయనున్నారు. అక్కడ అనుసరిస్తున్న ఉత్తమ విధానాలను భద్రాద్రి కొత్తగూడెం జిల్లాలోని వెనుకబడిన ప్రాంతాల సమగ్ర అభివృద్ధికి ఏ విధంగా అన్వయించవచ్చనే అంశంపై ఆయన పరిశీలన జరుపుతారు. ఈ అంతర్జాతీయ స్థాయి అవకాశం జిల్లా అభివృద్ధి కార్యక్రమాలను మరింత సమర్థవంతంగా ముందుకు తీసుకెళ్లేందుకు, భవిష్యత్తులో ప్రజలకు మరింత మెరుగైన సేవలు అందించేందుకు నూతన కార్యాచరణలను రూపొందించుకోవడానికి దోహదపడనుంది.
