తెలంగాణలో చైనా మోడల్‌: సీఎం రేవంత్ రెడ్డి

కలం, వెబ్ డెస్క్: తెలంగాణ రైజింగ్ గ్లోబల్ సమ్మిట్(Global Summit)-2025‌లో ముఖ్యమంత్రి రేవంత్ రెడ్డి కీలక ప్రసంగం చేశారు. చైనాలోని గ్వాంగ్-డాంగ్ ప్రావిన్స్ సాధించిన అభివృద్ధి గురించి ఆయన ప్రస్తావించారు. ఈ ప్రావిన్స్ చైనా ఆర్థిక వ్యవస్థలో అతిపెద్దదని వ్యాఖ్యానించారు. అక్కడ కేవలం 20 ఏండ్లలో గణనీయమైన ప్రగతి సాధించారని.. ఆ లక్ష్యంతోనే తాము ముందుకెళ్తున్నామని చెప్పారు. దేశ స్వాతంత్ర్యం అనంతరం మన నాయకులు కొత్త రాజ్యాంగాన్ని రూపొందించి భవిష్యత్తు కోసం రోడ్ మ్యాప్ వేశారన్నారు. తమ ప్రభుత్వం కూడా తెలంగాణ భవిష్యత్తు కోసం రోడ్ మ్యాప్ రూపొందించాలనుకుంటున్నదని చెప్పారు. మహాత్మా గాంధీ, డాక్టర్ బీఆర్ అంబేద్కర్, రాజ్యాంగ నిర్మాతల నుంచి తమ ప్రభుత్వం ఎంతో స్ఫూర్తిని పొందిందని పేర్కొన్నారు.

దశాబ్దాల పోరాటం

తెలంగాణ ప్రజలు దశాబ్దాలుగా ప్రత్యేక రాష్ట్రం కోసం పోరాడారని ముఖ్యమంత్రి గుర్తు చేశారు. సోనియా గాంధీ, ఆనాటి ప్రధాని డాక్టర్ మన్మోహన్ సింగ్ నాయకత్వంలో తెలంగాణ ఏర్పాటు కల సాకారమైందన్నారు. భారతదేశంలో యువ రాష్ట్రంగా తెలంగాణ అవతరించిందని చెప్పారు. వచ్చే పదేళ్లలో తెలంగాణను దేశంలోనే అత్యంత అభివృద్ధి చెందిన రాష్ట్రంగా, ప్రపంచంలోనే ఉన్నత రాష్ట్రంగా తీర్చిదిద్దడానికి తమ ప్రభుత్వం ప్రయత్నం చేస్తోందని చెప్పారు.

దేశానికి స్వాతంత్రం సిద్ధించి వంద సంవత్సరాలు పూర్తి చేసుకుంటున్న 2047 నాటికి మనమేం సాధించగమో చెప్పాలని నిపుణులను కోరారు. ఆ సమయంలోనే తెలంగాణ రైజింగ్-2047 దార్శనికతకు బీజం పడిందన్నారు. ‘మనమేదైనా గొప్పగా చేయాలని భావించినప్పుడు తెలంగాణ సంస్కృతిలో ముందుగా దేవుళ్ల ఆశీర్వాదం తీసుకుంటాం… ప్రజల మద్దతు కోరుతాం. భవిష్యత్తు కోసం మన కలలను నెరవేర్చుకోవడానికి ప్రజల ఆలోచనలు, అంచనాలు తెలుసుకున్నాం’ అని రేవంత్ రెడ్డి వ్యాఖ్యానించారు.

అధికారులు, కేంద్ర, రాష్ట్ర ప్రభుత్వ యంత్రాంగం, ఇండియన్ స్కూల్ ఆఫ్ బిజినెస్, నీతి ఆయోగ్ నిపుణుల సహాయం తీసుకున్నామని గుర్తు చేశారు. ఈ విజన్ రూపొందించడంలో సహయపడిన వారందరికీ ధన్యవాదాలు తెలిపారు.

‘ఈ గ్లోబల్ సమ్మిట్‌(Global Summit)కు అన్ని రంగాలకు చెందిన ప్రతినిధులు ఇక్కడకు రావడం మన అదృష్టంగా భావిస్తున్నాం. వ్యాపార వేత్తలు, కార్పొరేట్ దిగ్గజాలు, విధాన నిర్ణేతలు, దౌత్యవేత్తలు, ప్రభుత్వ అధికారులు, నిపుణులకు ధన్యవాదాలు.’ అని ముఖ్యమంత్రి రేవంత్ రెడ్డి పేర్కొన్నారు. ఈ సమ్మిట్ లో సూచనలు, సలహాలు, అభిప్రాయాలను స్వీకరించడానికి సిద్ధంగా ఉన్నామని రేవంత్ తెలిపారు.

తెలంగాణలో అపారమైన అవకాశాలు

తెలంగాణలో అపారమైన అవకాశాలు ఉన్నాయని రేవంత్ రెడ్డి పెట్టుబడిదారులకు తెలిపారు. పెట్టుబడులకు సానుకూల వాతావరణం ఉందన్నారు. 2034 నాటికి 1 ట్రిలియన్ డాలర్ల ఆర్థిక వ్యవస్థగా, 2047 నాటికి 3 ట్రిలియన్ డాలర్ల ఆర్థిక వ్యవస్థగా తీర్చిదిద్దాలని మేం సంకల్పించాం.

దేశ జీడీపీలో 5 శాతం వాటా

దేశంలో తెలంగాణ దాదాపు 2.9% జనాభా కలిగి ఉంది. దేశ జీడీపీలో తెలంగాణ నుంచి దాదాపు 5శాతం వాటాను అందిస్తున్నామన్నారు. 2047 నాటికి భారతదేశ జీడీపీలో 10శాతం వాటాను తెలంగాణ నుంచి అందించాలన్నది తమ ప్రభుత్వ లక్ష్యమన్నారు. సేవారంగం, తయారీ రంగం, వ్యవసాయ రంగం… ఇలా తెలంగాణను స్పష్టమైన 3 భాగాలుగా విభజించామని తెలిపారు. మూడు భాగాలుగా విభజించి ప్రాంతాల వారీగా అభివృద్ధి లక్ష్యాలను నిర్ధేశించుకున్న రాష్ట్రాల్లో దేశంలోనే తెలంగాణ మొట్టమొదటి రాష్ట్రం.

క్యూర్, ప్యూర్, రేర్

తెలంగాణ అభివృద్ధి కోసం క్యూర్, ప్యూర్, రేర్ మోడల్స్ నిర్ధేశించామన్నారు.
కోర్ అర్బన్ రీజియన్ ఎకానమీ (CURE), పెరి అర్బన్ రీజియన్ ఎకానమీ (PURE)
రూరల్ అగ్రికల్చర్ రీజియన్ ఎకానమీ (RARE)గా తెలంగాణను విభజిస్తామన్నారు.
చైనా, జపాన్, జర్మనీ, దక్షిణ కొరియా, సింగపూర్ దేశాల నుంచి మేమెంతో ప్రేరణ పొందామని పేర్కొన్నారు. ఇప్పుడు మేం ఆ దేశాలతో పోటీ పడాలనుకుంటున్నామన్నారు.

పెట్టుబడులకు ఆహ్వానిస్తున్నాం

తెలంగాణ రైజింగ్ ప్రయాణంలో సహకరించడానికి, పెట్టుబడి పెట్టడానికి, మాకు సంపూర్ణ మద్దతు ఇవ్వాలని ఆకాంక్షిస్తున్నామని పెట్టుబడిదారులకు ముఖ్యమంత్రి రేవంత్ రెడ్డి పిలుపునిచ్చారు. ‘ఈ విజన్ కష్టంగా అనిపించవచ్చు… కానీ ఆ విజన్‌ను సాధించగలం. ఈ విషయంలో మా టీమ్ కు నేను చెప్పేదొక్కటే.. కష్టంగా ఉంటే, వెంటనే చేపడుదాం. అసాధ్యం అని అనుకుంటే.. వారికి కొంత గడువు ఇస్తా. నేను నిన్నటి కంటే ఇవ్వాల ఎక్కువ విశ్వాసంతో, నమ్మకంతో ఉన్నా. నిన్నటిది ఒక కల, ఒక ప్రణాళిక… ఇవాళ మీరందరూ మాతో చేరారు. ఈ ప్రయాణంలో భాగస్వాములుగా ఉండాలని ఆశిస్తున్నాం. మీ అందరి మద్దతుతో తెలంగాణ రైజింగ్ లక్ష్యాలన్నింటినీ సాధించగలమని బలంగా నమ్ముతున్నా. చివరగా తెలంగాణ రైజింగ్ నిరంతర ప్రక్రియ.’ అంటూ సీఎం రేవంత్ రెడ్డి ప్రసంగాన్ని ముగించారు.

Read Also: ఎయిర్​పోర్ట్ కు బాంబ్​ థ్రెట్​.. సమ్మిట్​పై ఎఫెక్ట్​

Follow Us on: Youtube