ఐటీ హబ్‌గా పేరుగాంచిన మాదాపూర్‌లో భారీ మోసం(Fraud) వెలుగు చూసింది. ఎన్‌ఎస్‌ఎన్ ఇన్ఫోటెక్ పేరుతో పనిచేస్తున్న ఒక ఐటీ సంస్థ దాదాపు బోర్డు తిప్పేసింది. ఈ సంస్థ ఇటీవల 400 మంది ఫ్రెషర్లను నియమించుకున్నది. వారి నుంచి ఒక్కొక్కరి నుంచి మూడు నుంచి నాలుగు లక్షలు వసూలు చేసినట్టు సమాచారం. ట్రైనింగ్ ఇస్తామని నమ్మించి అకస్మాత్తుగా బోర్డు తిప్పేసింది.
సాఫ్ట్‌వేర్ రంగంలో ఉద్యోగాల కోసం నగరానికి వచ్చే యువతను టార్గెట్ చేస్తూ ఈ సంస్థ ప్రత్యేక ట్రైనింగ్ ప్రోగ్రామ్ పేరిట డబ్బులు వసూలు చేసినట్లు తెలుస్తోంది. నెలలపాటు శిక్షణ ఇచ్చి, “ప్రాజెక్ట్ రెడీ”, “ప్లేస్‌మెంట్ ఖాయం” అని నమ్మబలికిన కంపెనీ హెడ్ స్వామి నాయుడు తాజాగా కనిపించకుండా పోవడంతో బాధితులు లబోదిబోమంటున్నారు.
కంపెనీ కార్యాలయం ప్రస్తుతం పూర్తిగా మూతపడింది. కార్యాలయానికి తాళం వేశారు. సంస్థ యాజమాన్యం ఫోన్, మెయిల్ లో స్పందించడం లేదు. దీంతో మోసపోయిన నిరుద్యోగులు పోలీస్ స్టేషన్ కు చేరుకొని ఫిర్యాదుల చేశారు. మాదాపూర్, సైబరాబాద్ పోలీసులకు ఇప్పటికే పలువురు ఫిర్యాదులు అందినట్లు సమాచారం.
తెలంగాణలో ఐటీ హబ్ పేరిట ఇటువంటి నకిలీ కంపెనీలు పెరుగుతున్నాయని నిపుణులు హెచ్చరిస్తున్నారు. ప్రత్యేకంగా రెంటల్ వర్క్‌ స్టేషన్లు, అపార్టుమెంట్లలో నడిచే సంస్థలలో ఉద్యోగ భవిష్యత్తు పేరుతో మోసపూరిత కార్యకలాపాలు ఎక్కువగా జరుగుతున్నాయి. నగరంలో పనిచేస్తున్న ఇలాంటి చిన్న కంపెనీల్లో దాదాపు 90 శాతం వరకూ ప్రాజెక్టులు లేవని, నిధుల కోసం మాత్రమే అభ్యర్థులను దోచుకుంటున్నాయని హెచ్చరికలు వెలువడుతున్నాయి.
ఈ ఘటనపై బాధితులు కఠిన చర్యలు తీసుకోవాలని పోలీసులను కోరుతున్నారు. స్వామి నాయుడు సహా సంస్థ యాజమాన్యంపై మోసం(Fraud) కేసులు నమోదు చేసి త్వరితగతిన అరెస్టు చేయాలని వారు డిమాండ్ చేస్తున్నారు.
Read Also: రికవరీ బంగారాన్ని చోరీ చేసిన ఎస్సై
Follow Us on: Youtube
