పంచాయతీ ఎన్నికల రిజర్వేషన్లపై బీసీ సంఘాలు తీవ్ర ఆగ్రహం వ్యక్తం చేస్తున్నాయి. బీసీలకు 42 శాతం రిజర్వేషన్లు ఇస్తామంటూ కాంగ్రెస్ పార్టీ ప్రజలను మోసం చేసిందని వారు అంటున్నారు. పంచాయతీ ఎన్నికల్లో చాలా జిల్లాల్లో బీసీలకు కనీసం ప్రాతినిథ్యం ఇవ్వలేకపోయారని చెబుతున్నారు. బీసీలకు రిజర్వేషన్ల కేటాయింపులో ప్రభుత్వం తీవ్ర అన్యాయం చేసిందని ఎంపీ ఆర్. కృష్ణయ్య(R Krishnaiah) విమర్శించారు. ముందుగా ప్రకటించిన కోటా ప్రకారం ఇవ్వాల్సిన రిజర్వేషన్లను గణనీయంగా తగ్గించి, ఇష్టానుసారంగా వాటాను కేటాయించారని ఆయన ఆగ్రహం వ్యక్తం చేశారు. ముఖ్యంగా ఉత్తర తెలంగాణలోని పలు జిల్లాల్లో బీసీ వర్గాలపై తీవ్ర అన్యాయం జరిగిందని చెప్పారు.
ఆదిలాబాద్ జిల్లాలో బీసీలకు 23 శాతం రిజర్వేషన్లు ఇస్తామని ప్రభుత్వం చెప్పి, చివరకు కేవలం 11 శాతానికే పరిమితం చేసిందని ఎంపీ కృష్ణయ్య విమర్శించారు. ఇది బీసీలను మోసం చేసినట్లేనని ఆయన అభిప్రాయపడ్డారు. అంతే కాకుండా ఖమ్మం జిల్లాలో కూడా పరిస్థితి భిన్నంగా లేదని, అక్కడ బీసీ వర్గాలకు కేవలం 10 శాతం మాత్రమే రిజర్వేషన్లు కేటాయించి వివక్షకు పాల్పడ్డారని పేర్కొన్నారు.
ప్రభుత్వం ప్రకటించిన రిజర్వేషన్ విధానంలో భారీ లోపాలు ఉన్నాయని, దీనివల్ల బీసీ వర్గాలు నష్టపోతున్నాయని ఎంపీ కృష్ణయ్య అన్నారు. నిజమైన జనాభా నిష్పత్తి, వర్గాల సామాజిక-ఆర్ధిక పరిస్థితులను పరిగణనలోకి తీసుకొని రిజర్వేషన్లు పెంచాలని ప్రభుత్వాన్ని ఆయన డిమాండ్ చేశారు. రిజర్వేషన్ విషయంలో ప్రభుత్వం పారదర్శకంగా వ్యవహరించాలని, బీసీ వర్గాల హక్కులను కాపాడే విధంగా నిర్ణయాలు తీసుకోవాలని కోరారు.
ఈ భారీ వ్యత్యాసం వల్ల జిల్లా బీసీ వర్గాలు అసంతృప్తితో ఉన్నాయని, స్థానిక నాయకులు కూడా అభ్యంతరం వ్యక్తం చేస్తున్నారని ఆయన సుత్తి లేకుండా చెప్పారు. “ఈ తేడా ఎలా వచ్చిందో ప్రభుత్వం స్పష్టత ఇవ్వాలి. బీసీల హక్కులను ఇలా తగ్గించడం సమంజసం కాదు” అని కృష్ణయ్య(R Krishnaiah) అన్నారు.
Read Also: సోనియా ఇటలీ నుంచి ఇండియాకు ఎందుకొచ్చారు: ఎంఐఎం
Follow Us on : Pinterest
