అయ్యప్ప మాల ధరించి దీక్ష పూర్తి చేసిన భక్తులు ఇరుముడులు చెల్లించేందుకు శబరిమల సన్నిధానానికి తరలి వెళుతున్నారు. అయితే ఇదే సమయంలో భక్తులు కేరళ వెళ్ళేందుకు కొంత భయపడుతున్నారు. అందుకు కారణం.. ఒక అమీబా. అదే బ్రెయిన్ ఈటింగ్ అమీబా(Brain Eating Amoeba). దీని కారణంగా మండలపూజలు, మకర జ్యోతి కోసం ఎదురుచూస్తున్న భక్తులు కలవరపడుతున్నారు. నదులు, చెరువుల్లో ఈ అమీబా ఉంటుంది. స్నానం కోసం నీటిలో మునిగిన సమయంలో ఈ అమీబా.. ముక్కు ద్వారా మెదడును చేరుకుంటుంది. ఇక అక్కడ మన మెదడును చిన్నగా తినడం ప్రారంభిస్తుంది. ఈ విషయం తెలిసినప్పటి నుంచి ఏం చేయాలి? అయ్యప్పను ఎలా దర్శించుకోవాలి? ఈ అమీబా బారి నుంచి ఎలా తప్పించుకోవాలి? అన్న ప్రశ్నలు భక్తుల్లో వెలువడుతున్నాయి.
శబరిగిరులు(Sabarimala) ఎక్కేముందు భక్తులు పంబా నదిలో పుణ్యస్నానం చేస్తారు. ఆ పుణ్య స్నానం తమ శరీరాన్ని, మనసును శుద్ధి చేస్తుందని భక్తుల నమ్మకం. ఆ స్నానం తర్వాతనే అయ్యప్ప దర్శనం కోసం వెళ్తారు. పంబ, కల్లార్, అళుత నదుల సంగమంలో అయితే ప్రతిరోజూ వేల మంది భక్తులు పుణ్యస్నానాలు ఆచరిస్తారు. ఈ సమయంలోనే బ్రెయిన్ ఈటింగ్ అమీబా(Brain Eating Amoeba) ఆందోళన అధికమవుతోంది. అయితే దానిని నుంచి బయటపడటానికి వైద్యులు చెప్తున్న జాగ్రత్తలు కొన్ని ఉన్నాయి.
బ్రెయిన్ ఈటింగ్ అమీబా అనేది.. పారే నీటిలో ఉండదని, కేవలం స్థిరంగా, నిశ్చలంగా ఉన్న నీటిలోనే ఉంటుందని వివరిస్తున్నారు. అది మనుషుల ముక్కు ద్వారా శరీరంలోకి ప్రవేశించి.. అక్కడి నుంచి మెదడును చేరి తన పని ప్రారంభిస్తుంది. అయితే ఈ అమీబా బారిన పడకుండా ఉండాలి అనుకుంటే.. స్థిరంగా ఉన్న నీటిలో స్నానం చేయకపోవడమే ఉత్తమమని వైద్యులు వివరిస్తున్నారు. కాదు మా సెంటిమెంట్, చేయాల్సిందే అనుకుంటే.. మెడ వరకు మాత్రమే మునగాలని, తలను నీటి బయట ఉంచడం ద్వారా ఈ అమీబా బారి నుంచి బయటపడొచ్చని అంటున్నారు.
అయితే నీటిలో మునిగిన సమయంలో తలను బయట ఉంచినంత మాత్రాన మనం సేఫ్ కాదని, బయటకువచ్చిన తర్వాత శుభ్రమైన నీటితో, వీలయితే వేడి నీటితో శుభ్రంగా స్నానం చేయాలని సూచిస్తున్నారు. లేని పక్షంలో మన చేతులకు అంటుకుని ఉండి.. మనం మన మొఖాలను తాకిన సమయంలో ముక్కు ద్వారా ఈ అమీబా లోపలికి వెళ్లే ప్రమాదం ఉందని వైద్యులు హెచ్చరిస్తున్నారు. ఒకవేళ ఏమాత్రం శరీరంలో అనీజీగా అనిపిస్తే వెంటనే వైద్యులను సంప్రదించాలని సూచిస్తున్నారు నిపుణులు.
Read Also: అర్ధరాత్రి రౌడీషీటర్ల ఇంటికి సజ్జనార్
Follow Us on: Youtube
