కలం, వెబ్డెస్క్: సత్య, ప్రేమకథ, హ్యాపీ తదితర సినిమాలతో పాటు ‘ఫ్యామిలీ మ్యాన్’ వెబ్సిరీస్తో తెలుగులోనూ పాపులర్ అయిన బాలీవుడ్ నటుడు మనోజ్ బాజ్పేయీ (Manoj Bajpayee). ఈయన ప్రధాన పాత్రలో నటిస్తున్న లేటెస్ట్ మూవీ ‘ఘూస్ఖోర్ పండత్’ వివాదాల్లో చిక్కుకుంది. మూవీ టైటిల్ తమను కించపరిచేలా ఉందంటూ ఓ సామాజిక వర్గం ఉత్తరప్రదేశ్లో ఆందోళనలు, నిరసనలు, ధర్నాలకు దిగింది. పోలీస్ స్టేషన్లలో ఫిర్యాదులు చేసింది. దీంతో మూవీపై ఉత్తరప్రదేశ్ ప్రభుత్వం ఎఫ్ఆర్ఐర్ నమోదు చేసింది. ఈ క్రమంలో కేంద్రం సైతం ఆగ్రహం వ్యక్తం చేయడంతో నెట్ఫ్లిక్స్ ఈ సినిమా టీజర్, ప్రోమోను తొలగించింది.
అసలేమైందంటే..
మనోజ్ బాజ్పేయీ ప్రధాన పాత్రలో ‘ఘూస్ఖోర్ పండత్’ మూవీని నెట్ఫ్లిక్స్ ఇండియా భాగస్వామ్యంతో ప్రొడ్యూసర్ నీరజ్ పాండే నిర్మిస్తున్నారు. నీరజ్పాండేతోపాటు రితేష్ షా డైరెక్టర్లు. ముఖ్య పాత్రల్లో నుస్రత్ భరూచా, శ్రద్ధా దాస్, కికు శ్రద్ధ నటిస్తున్నారు. ఈ మూవీకి సంబంధించిన టీజర్, ప్రోమోను ఈ నెల 3న నెట్ఫ్లిక్స్ రిలీజ్ చేసింది.
ఆ వెంటనే టైటిల్పై వివాదం రాజుకుంది. ఇందులోని ‘ఘూస్ఖోర్’ పదం పక్కన తమ సామాజిక వర్గాన్ని స్ఫురించేలా ‘పండత్’ పదం వాడడంపై ఓ సామాజిక వర్గం మండిపడింది. మూవీపై సోషల్ మీడియాలోనూ తీవ్ర విమర్శలు వచ్చాయి. అనంతరం ఉత్తరప్రదేశ్ రాష్ట్ర వ్యాప్తంగా నిరసనలు, ధర్నాలు మొదలయ్యాయి.
రాష్ట్రంలోని అధికార బీజేపీతోపాటు బహుజన్ సమాజ్ వాదీ (బీఎస్పీ) అధినేత్రి మాయావతి సైతం ఆందోళనకారులకు మద్దతు తెలిపారు. పరిస్థితి తీవ్రత గమనించిన యూపీ ప్రభుత్వం మూవీ యాక్టర్లు, ప్రొడ్యూసర్, డైరెక్టర్లతోపాటు నెట్ఫ్లిక్స్పైనా ఎఫ్ఐఆర్ నమోదు చేసింది. దీనిపై కేంద్రానికీ ఫిర్యాదు చేసింది. ఈ వివాదంపై ఆగ్రహం వ్యక్తం చేసిన కేంద్రం వెంటనే టీజర్, ప్రోమో తొలగించాలంటూ ఆదేశించింది. నెట్ఫ్లిక్స్ వెంటనే వాటిని తన ప్లాట్ఫామ్ నుంచి తొలగించింది.
ప్రజల మనోభావాలు గౌరవిస్తా: మనోజ్
వివాదంపై నటుడు మనోజ్ బాజ్పేయీ (Manoj Bajpayee) స్పందిస్తూ ప్రజల మనోభావాలను తాను గౌరవిస్తానని చెప్పారు. ఎవరినో కించపరచాలని తాము ఈ టైటిల్ పెట్టలేదని, తన పాత్ర స్వభావాన్ని చెప్పేలా మాత్రమే పెట్టామని ఆయన అన్నారు. ‘నటుడిగా నా బాధ్యత స్టోరీకి, పాత్రకు అనుగుణంగా నటించడం.. అంతే. నాకు సంబంధించినంత వరకు ఇది ఒక పాత్ర స్వభావాన్ని తెలిపే టైటిల్. అంతేకానీ, ఇది ఏ సామాజిక వర్గాన్నీ కించపరిచేది కాదు. అయితే, ప్రజల నుంచి వ్యతిరేకత వచ్చినందువల్ల, వారి అభిప్రాయాలను గౌరవిస్తూ సినిమా టీజర్, ప్రోమోను తొలగించాలని నిర్ణయించడం సంతోషకరం’ అని మనోజ్ అన్నారు.
‘ఇదొక కల్పిత పోలీస్ స్టోరీ. ఇందులో అతని స్వభావాన్ని తెలిపేలా పెట్టిన టైటిల్. ఇది ఏ మతాన్నీ, వర్గాన్నీ కించపర్చాలని పెట్టింది కాదు. అయితే, ప్రజల అభిప్రాయాన్ని గౌరవించడం మా బాధ్యత’ అని చెప్పారు.
