కలం, వెబ్డెస్క్: ఇరాన్ (Iran) లో ప్రభుత్వ వ్యతిరేక ఆందోళనలు చల్లారడం లేదు. దేశ కరెన్సీ విలువ దారుణంగా దిగజారడం, ద్రవ్యల్బణం పెరగడం, వ్యాపారాలు మూత పడడంతో రెండు వారాల కిందట మొదలైన ప్రజల నిరసనలు అంతకంతకూ ఉద్ధృతంగా జరుగుతున్నాయి. ఇరాన్ సుప్రీం లీడర్ అయతొల్లా ఖొమేనీని పదవి నుంచి దిగిపోవాలంటూ నిరసనకారులు డిమాండ్ చేస్తున్నారు. ఈ క్రమంలో పోలీసు, సైనిక దళాలు నిరసనకారులపై నిర్దాక్షిణ్యంగా విరుచుకుపడుతున్నాయి. ఈ ఘర్షణల్లో 2వేల మందికి పైగా మరణించినట్లు ఇరాన్ ప్రభుత్వాధికారి ఒకరు మంగళవారం వెల్లడించడం పరిస్థితి తీవ్రతను చెప్తోంది. అలాగే 10వేల మందికిపై పైగా పౌరులను నిర్బంధించినట్లు చెప్పారు. నిరసనలను అణచివేయడానికి ప్రభుత్వం అన్ని విధాలుగా ప్రయత్నిస్తోంది. ఆందోళనలు, అణచివేత బయటికి ప్రపంచానికి తెలియకుండా ఇప్పటికే ఇంటర్నెట్ను ఖొమేనీ ప్రభుత్వం బంద్ చేసింది. ప్రభుత్వ వ్యతిరేక ఆందోళనలు ఏ స్థాయిలో ఉన్నాయంటే 1979లో ఇరాన్లో రాచరిక పాలన అంతమైనప్పటి రోజులను గుర్తుకు తెస్తున్నట్లు అంతర్జాతీయ మీడియా చెబుతోంది.
దేనికైనా సిద్ధమే: ఖొమెనీ
ఇరాన్ (Iran) లో నిరసనకారులను చంపుతుండడంపై అమెరికా అధ్యక్షుడు ట్రంప్ ఆగ్రహం వ్యక్తం చేసిన సంగతి తెలిసిందే. ఈ క్రమంలో పరిస్థితి అదుపులోకి రాకుంటే తాము నేరుగా రంగంలోకి దిగాల్సి వస్తుందని హెచ్చరించారు కూడా. అయితే, ట్రంప్ హెచ్చరికలను ఇరాన్ లెక్కచేయడం లేదు. దౌత్య చర్చలకైనా, యుద్ధానికైనా తాము సిద్ధమేనని ఖొమేనీ ప్రతినిధి వెల్లడించారు. కాగా, ఇరాన్లో అల్లకల్లోలంపై ట్రంప్ జోక్యం చేసుకోవాలని, ఇరాన్ రాజ వంశస్తుడు, విదేశాల్లో తలదాచుకుంటున్న రెజా పెహ్లావీ కోరుతున్నారు. మరోవైపు ఇరాన్ విషయంలో ఇజ్రాయెల్ అప్రమత్తమైంది. తమపై అమెరికా దాడి చేస్తే తాము ఇజ్రాయెల్ను టార్గెట్ చేసుకుంటామని ఇరాన్ హెచ్చరించడం దీనికి కారణం.
