కలం, జగిత్యాల: రైతులు పండించిన ప్రతి ధాన్యపు గింజకు ప్రభుత్వం ప్రకటించిన మద్దతు ధర లభించేలా ఏర్పాటు చేస్తున్న వరి ధాన్యం కొనుగోలు కేంద్రాలను సద్వినియోగం చేసుకోవాలని జగిత్యాల ప్రాథమిక వ్యవసాయ సహకార సంఘం (పీఏసీఎస్) చైర్మన్ దామోదర్ రావు సూచించారు. రైతుల సంక్షేమం, ఆర్థిక అభివృద్ధిని దృష్టిలో ఉంచుకుని ప్రభుత్వం గ్రామాల్లోనే కొనుగోలు కేంద్రాలను ఏర్పాటు చేస్తోందని తెలిపారు. ఇందులో భాగంగా జగిత్యాల రూరల్ మండలం పోరండ్ల (Porandla) గ్రామంలో పీఏసీఎస్ ఆధ్వర్యంలో బుధవారం ఏర్పాటు చేసిన వరి ధాన్యం కొనుగోలు కేంద్రాన్ని ఆయన ప్రారంభించారు.
కొనుగోలు కేంద్రాలను సద్వినియోగం చేసుకోవాలి
ఈ సందర్భంగా దామోదర్ రావు మాట్లాడుతూ.. రైతులు ఆరుగాలం కష్టపడి పండించిన పంటను విక్రయించే సమయంలో నష్టపోకుండా ప్రభుత్వం కొనుగోలు కేంద్రాల ద్వారా మద్దతు ధర కల్పిస్తోందన్నారు. రైతులు ధాన్యం విక్రయించేందుకు దళారులను ఆశ్రయించవద్దని, మధ్యవర్తుల మాటలు నమ్మి తక్కువ ధరకు విక్రయించి నష్టపోవద్దని సూచించారు. ప్రభుత్వ కొనుగోలు కేంద్రాలకు ధాన్యాన్ని తీసుకువచ్చి నిబంధనల ప్రకారం విక్రయించి గిట్టుబాటు ధర పొందాలని కోరారు.
గ్రామీణ ప్రాంత రైతులకు కొనుగోలు కేంద్రాలు ఎంతో ప్రయోజనకరంగా ఉంటాయని, తమ గ్రామాలకు సమీపంలోనే ధాన్యాన్ని విక్రయించుకునే అవకాశం కలుగుతుందని తెలిపారు. కొనుగోలు ప్రక్రియలో రైతులకు ఎలాంటి ఇబ్బందులు తలెత్తకుండా నిర్వాహకులు ప్రత్యేక శ్రద్ధ తీసుకోవాలని సూచించారు. ధాన్యం నాణ్యత పరిశీలన, తూకం, నమోదు తదితర ప్రక్రియలను నిబంధనల ప్రకారం పారదర్శకంగా నిర్వహించి రైతులకు అవసరమైన సహకారం అందించాలని ఆదేశించారు.
రైతులు కూడా కొనుగోలు కేంద్రాలకు ధాన్యాన్ని తీసుకువచ్చే సమయంలో ప్రభుత్వం నిర్దేశించిన నాణ్యతా ప్రమాణాలను పాటించాలని సూచించారు. కొనుగోలు ప్రక్రియలో ఏవైనా సమస్యలు ఎదురైతే సంబంధిత నిర్వాహకుల దృష్టికి తీసుకువచ్చి పరిష్కరించుకోవాలని తెలిపారు. రైతుల ప్రయోజనాలే ప్రధాన లక్ష్యంగా పీఏసీఎస్ ఆధ్వర్యంలో కొనుగోలు కేంద్రం ద్వారా సేవలు అందిస్తామని, రైతులు ఎలాంటి ఆందోళన చెందకుండా ప్రభుత్వ కొనుగోలు సదుపాయాలను వినియోగించుకోవాలని దామోదర్ రావు కోరారు. ఈ కార్యక్రమంలో గ్రామ సర్పంచ్ హరీష్, పీఏసీఎస్ సీఈఓ వేణు, మాజీ సర్పంచ్ శేఖర్, గ్రామ నాయకులు, రైతులు తదితరులు పాల్గొన్నారు.

