కలం, స్పోర్ట్స్: భారత స్టార్ షట్లర్ లక్ష్య సేన్ (Lakshya Sen) బీడబ్ల్యూఎఫ్ టూర్‌లో వరుసగా రెండో ఫైనల్‌కు చేరారు. శనివారం జరిగిన కుమమోటో మాస్టర్స్ జపాన్ సూపర్ 500 సెమీఫైనల్‌లో ఇండోనేషియా ఆటగాడు అల్వి ఫర్హాన్‌పై 21-12, 15-21, 21-11 తేడాతో గెలుపొందారు. 70 నిమిషాల పాటు సాగిన ఈ మ్యాచ్‌లో తొలి గేమ్‌ను సేన్ 9-3 ఆధిక్యంతో దూకుడుగా మొదలుపెట్టారు. మధ్యలో ఫర్హాన్ 10-7తో పోటీనిచ్చినా, సేన్ పట్టు బిగించి 21-12తో గేమ్ గెలిచారు. రెండో గేమ్‌లో ఫర్హాన్ వరుసగా ఏడు పాయింట్లు సాధించి 11-4 ఆధిక్యంలోకి వెళ్లాడు. సేన్ గట్టిగా ప్రయత్నించినా 15-21తో గేమ్ కోల్పోయారు. టోర్నీలో సేన్ ఓడిన తొలి గేమ్ ఇదే.
నిర్ణయాత్మక మూడో గేమ్‌లో సేన్ 5-2 ఆధిక్యంతో ఆరంభించి, 8-6 వద్ద వరుసగా ఐదు పాయింట్లు గెలిచారు. ఆ తర్వాత 21-11తో గేమ్‌తో పాటు మ్యాచ్‌ను కైవసం చేసుకున్నారు. ఫర్హాన్‌తో ఆడిన మూడు మ్యాచ్‌లలో సేన్‌కు ఇదే తొలి విజయం. ఈ ఏడాది మార్చిలో ఆల్ ఇంగ్లాండ్ ఛాంపియన్‌షిప్ ఫైనల్‌కు చేరిన సేన్, ఈ నెలలో జర్మనీలో హైలో ఓపెన్ గెలిచారు. గతేడాది కుమమోటో సెమీస్‌లో ఓడిన ఆయన, ఈసారి ఫైనల్‌కు చేరారు. టైటిల్ పోరులో కోకి వటనాబే లేదా కున్లావుట్ విటిడ్సార్న్‌తో తలపడనున్నారు.
