కలం, స్పోర్ట్స్ : మాంచెస్టర్ యునైటెడ్‌లో (Manchester United) కీలక మార్పు చోటుచేసుకుంది. జట్టు హెడ్ కోచ్ మైఖేల్ క్యారిక్‌పై యాజమాన్యం వేటు వేసింది. ప్రీమియర్ లీగ్‌లో జట్టు పేలవ ప్రదర్శన చేయడం, పది మ్యాచ్‌ల్లో కేవలం ఎనిమిది పాయింట్లే సాధించడంతో ఈ నిర్ణయం తీసుకుంది. క్యారిక్ స్థానంలో అమెరికా జట్టు కోచ్ మౌరిసియో పోచెట్టినో బాధ్యతలు చేపట్టే అవకాశం ఉంది. గత సీజన్‌లో క్యారిక్ యునైటెడ్‌ను మూడో స్థానంలో నిలిపాడు. అయితే ఈ సీజన్‌లో జట్టు పరిస్థితి పూర్తిగా మారిపోయింది. ఇప్పటివరకు అన్ని పోటీల్లో 15 మ్యాచ్‌లు ఆడిన యునైటెడ్ కేవలం మూడు విజయాలే సాధించింది. ప్రీమియర్ లీగ్‌లోనూ జట్టు పాయింట్ల పట్టికలో అట్టడుగు స్థానానికి పడిపోయింది.
ఆదివారం ఆస్టన్ విల్లాతో జరిగిన మ్యాచ్‌లో యునైటెడ్ 4-4తో డ్రా చేసుకుంది. అదే క్యారిక్‌కు చివరి మ్యాచ్‌గా మారింది. ఆ మ్యాచ్ తర్వాత కూడా తాను బాధ్యతల నుంచి తప్పుకోబోనని క్యారిక్ స్పష్టం చేశాడు. కానీ జట్టు ప్రదర్శనను మెరుగుపరిచేందుకు కోచ్‌ను మార్చాలని యాజమాన్యం నిర్ణయించింది. క్యారిక్ స్థానంలో పోచెట్టినోను నియమించేందుకు యునైటెడ్ ప్రయత్నాలు చేస్తోంది. ఆయనతో ప్రాథమిక స్థాయిలో ఒప్పందం కుదిరినట్లు వార్తలు వస్తున్నాయి. అయితే దీనిపై క్లబ్ నుంచి అధికారిక ప్రకటన రావాల్సి ఉంది. ప్రస్తుతం అమెరికా జాతీయ జట్టుకు కోచ్‌గా ఉన్న పోచెట్టినోకు ఇంగ్లిష్ ప్రీమియర్ లీగ్‌లో సౌతాంప్టన్, టోటెన్‌హామ్, చెల్సియా జట్లకు పనిచేసిన అనుభవం ఉంది.
