క‌లం, స్పోర్ట్స్‌: చెన్నై ఓపెన్ టైటిల్ గెలిచిన ఆనందం కంటే.. క్రాకోవ్‌లో జరిగిన విషాదమే తనను ఎక్కువగా కలచివేసిందని పోలాండ్ టెన్నిస్ స్టార్ మాగ్డా లినెట్ (Magda Linette) తెలిపారు. చెన్నై ఓపెన్‌లో అద్భుత విజయం సాధించిన ఆమె.. ఈ టైటిల్‌ను క్రాకోవ్ కాల్పుల ఘటనలో ప్రాణాలు కోల్పోయిన వారికి అంకితం చేశారు. విజయం సాధించినప్పటికీ.. ఆ విషాదం కారణంగా సంబరాలు చేసుకునే పరిస్థితి లేదని ఆమె భావోద్వేగంగా పేర్కొన్నారు. చెన్నై ఓపెన్ ఫైనల్లో లినెట్.. టాప్ సీడ్, డిఫెండింగ్ ఛాంపియన్ జానిస్ టియన్‌తో తలపడ్డారు. హోరాహోరీగా సాగిన ఈ మ్యాచ్‌లో తొలి సెట్‌ను 5-7తో కోల్పోయారు.
అయితే, ఆ తర్వాత అద్భుతంగా పుంజుకున్నారు. రెండో సెట్‌లో 6-1తో ప్రత్యర్థిపై పూర్తి ఆధిపత్యం ప్రదర్శించారు. నిర్ణయాత్మక మూడో సెట్‌లోనూ 6-4తో విజయం సాధించారు. మొత్తంగా 5-7, 6-1, 6-4 తేడాతో జానిస్ టియన్‌ను ఓడించి చెన్నై ఓపెన్ టైటిల్‌ను సొంతం చేసుకున్నారు. ఈ విజయంతో లినెట్ కెరీర్‌లో నాలుగో డబ్ల్యూటీఏ సింగిల్స్ టైటిల్‌ను గెలుచుకున్నారు. రెండేళ్లకు పైగా విరామం తర్వాత ఆమె ఖాతాలో మరో టైటిల్ చేరింది. అంతేకాదు.. 2022లో ఇదే చెన్నై ఓపెన్‌లో రన్నరప్‌గా నిలిచిన లినెట్.. ఈసారి మాత్రం ఛాంపియన్‌గా నిలిచారు.
ఈ టోర్నీలో లినెట్ ప్రయాణం అంత సులభంగా సాగలేదు. కీలక మ్యాచ్‌ల్లో వెనుకబడిన సందర్భాల్లోనూ ఆమె పోరాటం కొనసాగించారు. ఫైనల్లోనూ తొలి సెట్ కోల్పోయినప్పటికీ ఒత్తిడికి తలొగ్గకుండా పుంజుకుని విజయం సాధించారు. మరోవైపు, పోలాండ్‌లోని క్రాకోవ్‌లో జరిగిన కాల్పుల ఘటన లినెట్‌ను తీవ్రంగా కలచివేసింది. ఈ ఘటనలో ఆరుగురు ప్రాణాలు కోల్పోగా.. 15 మంది గాయపడ్డారు. ఈ నేపథ్యంలోనే చెన్నైలో సాధించిన విజయాన్ని బాధితులకు అంకితం చేశారు.
తన దేశంలో ఇలాంటి విషాదం చోటుచేసుకున్న సమయంలో టైటిల్ గెలిచిన ఆనందాన్ని పూర్తిగా ఆస్వాదించలేకపోతున్నట్లు ఆమె వెల్లడించారు. ఇక వాతావరణ పరిస్థితుల కారణంగా చెన్నై ఓపెన్ ఫైనల్ ఒక రోజు ఆలస్యంగా జరిగింది. ఆదివారం జరగాల్సిన మ్యాచ్ సోమవారానికి వాయిదా పడింది. చివరకు ఫైనల్లో విజయం సాధించిన లినెట్.. తన కెరీర్‌లో మరో ముఖ్యమైన టైటిల్‌ను అందుకోవడంతో పాటు, ఈ విజయాన్ని విషాదంలో ఉన్న తన దేశ ప్రజలకు అంకితం చేశారు.
