కలం, మహబూబ్ నగర్ బ్యూరో : గ్రామ సభల ద్వారా ప్రజల అవసరాలకు అనుగుణంగా అభివృద్ధి పనులను గుర్తించి, ప్రాధాన్యత క్రమంలో చేపట్టడం జరుగుతుందని స్థానిక సంస్థల అదనపు కలెక్టర్ మధుసూదన్ నాయక్ (Madhusudan Naik) అన్నారు. గాంధీ జయంతి సందర్భంగా శుక్రవారం అడ్డకల్(Addakal) మండల కేంద్రంలో నిర్వహించిన కార్యక్రమాల్లో అదనపు కలెక్టర్ పాల్గొన్నారు. అనంతరం అడ్డకల్ గ్రామంలో నిర్వహించిన గ్రామ సభకు ఎంపీడీవో, ప్రాథమిక ఆరోగ్య కేంద్రం వైద్యాధికారి, సర్పంచ్, ఉప సర్పంచ్, పంచాయతీ కార్యదర్శి, ఈసీ తదితరులతో కలిసి హాజరయ్యారు.
ఈ సందర్భంగా గ్రామ ప్రజల అవసరాలు, స్థానిక సమస్యలు, మౌలిక వసతులు, పారిశుద్ధ్యం, తాగునీరు, రహదారులు తదితర అంశాలపై గ్రామ సభలో చర్చించారు. గ్రామ అభివృద్ధికి అవసరమైన పనులను ప్రజల భాగస్వామ్యంతో గుర్తించి, వాటికి ప్రాధాన్యత కల్పించడంలో గ్రామ సభలు కీలక వేదికలుగా నిలుస్తాయని అదనపు కలెక్టర్ పేర్కొన్నారు. VBG-RAM-G పథకం కింద గ్రామానికి అవసరమైన పనులను గుర్తించడం, వాటి ప్రాధాన్యతను నిర్ణయించడం, ప్రజల అభిప్రాయాలను పరిగణనలోకి తీసుకుని పనులను ఎంపిక చేయడం వంటి అంశాలపై చర్చించారు. గ్రామ అవసరాలకు అనుగుణంగా పనుల ప్రతిపాదనలు రూపొందించేలా సంబంధిత అధికారులు సమన్వయంతో పనిచేయాలని అదనపు కలెక్టర్ సూచించారు.
అనంతరం ముసాపేట మండలం జనంపేట గ్రామంలో నిర్వహించిన గ్రామ సభకు సర్పంచ్, ఉప సర్పంచ్, ఈసీ, పంచాయతీ కార్యదర్శితో కలిసి మధుసూదన్ నాయక్ హాజరయ్యారు. గ్రామ అభివృద్ధికి అవసరమైన పనులు, ప్రజల ప్రాధాన్యతలు, స్థానికంగా చేపట్టాల్సిన అభివృద్ధి కార్యక్రమాలపై చర్చించారు. జనంపేటలోనూ VBG-RAM-G పథకం కింద చేపట్టాల్సిన పనులను గ్రామ ప్రజల అవసరాలు, ప్రాధాన్యతలకు అనుగుణంగా ఎంపిక చేసే అంశంపై చర్చ జరిగింది. గ్రామ సభల ద్వారా ప్రజల భాగస్వామ్యంతో అభివృద్ధి ప్రణాళికలను రూపొందించి, గ్రామాల సమగ్ర అభివృద్ధికి అవసరమైన పనులను ప్రాధాన్యత క్రమంలో చేపట్టే ప్రక్రియ కొనసాగుతుందని అదనపు కలెక్టర్ తెలిపారు.
