కలం, కరీంనగర్ బ్యూరో: కరీంనగర్ జిల్లా సహకార కేంద్ర బ్యాంకు (KDCCB) చైర్మన్ పదవి పొడిగింపులు, తాజా పరిణామాల నేపథ్యంలో ఒక కీలక ముందడుగు పడింది. గత కొంతకాలంగా పాలకవర్గాల గడువు ముగిసి, ప్రత్యేక అధికారి లేదా తదుపరి కమిటీ ఏర్పాటుపై నెలకొన్న ఉత్కంఠకు తెరదించుతూ బ్యాంకు మాజీ చైర్మన్ కొండూరు రవీందర్ రావు (Konduru Ravinder Rao) సోమవారం సాయంత్రం కేడీసీసీబీ పర్సన్ ఇన్ చార్జ్గా బాధ్యతలు స్వీకరించారు. తెలంగాణ హైకోర్టు ఇటీవల వెలువరించిన ముఖ్యమైన ఆదేశాల నేపథ్యంలో ఆయన తిరిగి ఈ పదవిలో బాధ్యతలు చేపట్టారు.
కేంద్ర సహకార బ్యాంకులకు సంబంధించి రాష్ట్ర ప్రభుత్వం గతంలో జారీ చేసిన G.O.Rt.No.598ను రద్దు చేస్తూ, గతంలో అమల్లో ఉన్న G.O.Rt.No.386నే కొనసాగించాలని గౌరవ హైకోర్టు స్పష్టమైన తీర్పునిచ్చింది. హైకోర్టు ఉత్తర్వుల ప్రకారం రవీందర్ రావు స్థానిక డీసీసీబీ ప్రధాన కార్యాలయంలో బాధ్యతలు స్వీకరించారు.
గడువు ముగింపు – పొడిగింపుల నేపథ్యం
రవీందర్ రావు నేతృత్వంలోని కేడీసీసీబీ మునుపటి పాలకవర్గం అధికారిక గడువు 14 ఫిబ్రవరి 2025 నాటికే ముగిసింది. అయితే, సహకార రంగానికి ఉన్న ప్రాధాన్యతను దృష్టిలో ఉంచుకుని రాష్ట్ర ప్రభుత్వం ఫిబ్రవరి 15, 2025న ఒకసారి, అనంతరం ఆగస్టు 14, 2025న మరోసారి ఆరు నెలల చొప్పున కమిటీ గడువును పొడిగించింది. ఆ పొడిగింపుల గడువు ముగిసినప్పటికీ, బ్యాంకు దైనందిన కార్యకలాపాలకు ఆటంకం కలగకుండా ఉండేందుకు ప్రభుత్వం ఆయనను ‘పర్సన్ ఇన్ చార్జ్’ (PIC) గా నియమించడంతో ఈ రోజు ఆయన బాధ్యతలు స్వీకరించారు.
లాభాల బాటలో బ్యాంకు ప్రస్థానం:
రవీందర్ రావు (Konduru Ravinder Rao) సుదీర్ఘ నాయకత్వంలో కేడీసీసీబీ జాతీయ స్థాయిలో అత్యుత్తమ సహకార బ్యాంకుగా గుర్తింపు పొందింది. ఇటీవలి ఆర్థిక సంవత్సరాల్లో బ్యాంకు ఏకంగా రూ. 7,000 కోట్ల వ్యాపార మార్కును దాటడమే కాకుండా, తన చరిత్రలోనే అత్యధికంగా రూ. 119.31 కోట్ల స్థూల లాభాన్ని నమోదు చేసి సరికొత్త రికార్డు సృష్టించింది. నేడు బాధ్యతలు స్వీకరించిన అనంతరం ఆయన మాట్లాడుతూ.. రైతు సంక్షేమం, పీఏసీఎస్ (PACS) ల బలోపేతమే ధ్యేయంగా బ్యాంకును మరింత ముందుకు తీసుకెళ్తామని స్పష్టం చేశారు. ఈ కార్యక్రమంలో బ్యాంకు సీఈవో ఎన్. సత్యనారాయణ రావుతో పాటు పలువురు ఉన్నతాధికారులు పాల్గొన్నారు.
Also Read : సిలబస్ మార్పులపై టీజీపీఎస్సీ కీలక ప్రకటన
Follow Us On : WhatsApp
