కలం, స్పోర్ట్స్ : దులీప్ ట్రోఫీ సెమీఫైనల్లో ఒక అద్భుతం జరిగింది. 15 ఏళ్ల కుర్రాడు వైభవ్ సూర్యవంశీ (Vaibhav Sooryavanshi) తన నాయకత్వ ప్రతిభతో అందరినీ ఆశ్చర్యపరిచాడు. తాజా అప్డేట్ ప్రకారం, ఆదివారం బెంగళూరులో సెంట్రల్ జోన్తో జరుగుతున్న మ్యాచ్లో వైభవ్ సమయస్ఫూర్తితో తీసుకున్న ఒక DRS నిర్ణయం మ్యాచ్ స్వరూపాన్నే మార్చేసింది. ఈ మ్యాచ్లో ఈస్ట్ జోన్ టాస్ గెలిచి మొదట బౌలింగ్ ఎంచుకుంది.
ప్రారంభ సెషన్లోనే బౌలర్లు విజృంభించడంతో సెంట్రల్ జోన్ త్వరగానే వికెట్లు కోల్పోయింది. అభిమాన్ ముఖార్జీ, ముకేశ్ కుమార్ ధాటికి 81 పరుగులకే 3 వికెట్లు పడిపోయాయి. అయితే, వికెట్ కీపింగ్ చేస్తున్న సమయంలో ఈస్ట్ జోన్ రెగ్యులర్ కెప్టెన్ ఇషాన్ కిషన్ బొటనవేలికి గాయమైంది. దీంతో ఆయన మైదానం వీడాల్సి వచ్చింది. కుమార్ కుషాగ్రా కీపింగ్ బాధ్యతలు చేపట్టగా, వైస్ కెప్టెన్గా ఉన్న వైభవ్ సూర్యవంశీ (Vaibhav Sooryavanshi) తాత్కాలిక కెప్టెన్గా బాధ్యతలు తీసుకున్నాడు.40వ ఓవర్లో మ్యాచ్ తిరిగే ఘట్టం చోటుచేసుకుంది.
ముకేశ్ కుమార్ వేసిన బంతిని 46 పరుగుల వద్ద ఉన్న ఆర్యన్ జుయల్ ఆడేందుకు ప్రయత్నించాడు. బంతి వికెట్ కీపర్ చేతుల్లోకి వెళ్లడంతో ఈస్ట్ జోన్ ఆటగాళ్లు అవుట్ అని గట్టిగా అప్పీల్ చేశారు. కానీ ఆన్-ఫీల్డ్ అంపైర్ నాటౌట్గా ప్రకటించాడు. జట్టు సభ్యుల్లో కొంత అయోమయం నెలకొన్నప్పటికీ, వైభవ్ తన సహజ సిద్ధమైన ఆలోచనను నమ్మాడు. చివరి క్షణంలో సమీక్షకు (DRS) వెళ్లాలని నిర్ణయించాడు. అల్ట్రాఎడ్జ్ లో బంతి బ్యాట్ను తాకినట్లు స్పష్టంగా కనిపించింది. దీంతో మూడో అంపైర్ ఆర్యన్ జుయల్ను అవుట్గా ప్రకటించాడు.
అంతకుముందు క్వార్టర్ ఫైనల్లోనూ వైభవ్ బ్యాటింగ్లో తక్కువ పరుగులు చేసినా, బౌలింగ్లో రెండు వికెట్లు తీసి ఆకట్టుకున్నాడు. బ్యాటర్లు బౌలింగ్ను, బౌలర్లు బ్యాటింగ్ను ఇష్టపడతారని వైభవ్ బిసిసిఐ డొమెస్టిక్ వీడియో సంభాషణలో పేర్కొన్నాడు. తనకు వికెట్లు తీసే నైపుణ్యం ఉందనే విషయం ఇషాన్ కిషన్కు ముందే తెలియదని సరదాగా పంచుకున్నాడు.
Also Read : బండి సంజయ్పై చర్యలు ఉండవా?: ఆర్ఎస్ ప్రవీణ్ కుమార్
Follow Us On : WhatsApp
