కలం, వెబ్డెస్క్: దేశంలో స్టార్లింక్ సహా వివిధ కంపెనీల శాటిలైట్ ఫోన్ సర్వీసు (Satcom) లకు అనుమతి ఇచ్చే విషయంలో కేంద్రం మరో కీలక మెలిక పెట్టింది. దేశ భద్రతా ప్రమాణాలకు అనుగుణంగా ఉంటేనే లైసెన్స్ ఇవ్వనుంది. ఈ మేరకు కేంద్ర టెలికాం శాఖ మంత్రి జ్యోతిరాదిత్య సింధియా ఆదివారం ఓ ఇంటర్వ్యూలో స్పష్టం చేశారు. ‘శాటిలైట్ ఫోన్ సర్వీసులకు లైసెన్స్ ఇచ్చే విషయం రెండు అంశాలపై ఆధారపడి ఉంది. ఒకటి అంతర్జాతీయ గేట్వేలకు సంబంధించి భారత్ సూచించిన నిర్దిష్ట భద్రత ప్రమాణాలు పాటించడం, రెండు డేటా కచ్చితంగా ఇండియాలోనే ఉండడం. వీటికి ఒప్పుకుంటేనే స్టార్లింక్, ఈయూటెల్సాట్, వన్వెబ్, జియో ఎస్జీఎస్ వంటి శాటిలైట్ ఫోన్ సర్వీసులకు లైసెన్స్’ అని సింధియా స్పష్టం చేశారు. కాగా, ఇప్పటికే ప్రభుత్వం శాట్కామ్ కంపెనీలకు తాత్కాలికంగా స్పెక్ట్రమ్ కేటాయించిందని చెప్పిన ఆయన, స్పెక్ట్రం ధరల ఖరారుపై టెలికాం డిపార్ట్మెంట్(డీవోటీ), ట్రాయ్ పనిచేస్తున్నాయని చెప్పారు. ఈ అంశం త్వరలోనే పరిష్కారమవుతుందని అన్నారు. మొత్తం మీద భద్రతా అనుమతులు, స్ప్రెక్ట్రమ్ కేటాయింపు తర్వాతే దేశంలో శాటిలైట్ కమ్యూనికేషన్ సేవలు ప్రారంభమవుతాయని సింధియా స్పష్టం చేశారు.
అయితే, శాట్కామ్ సేవల (Satcom) కు స్పెక్ట్రమ్ కేటాయింపుపై డీవోటీ, ట్రాయ్ మధ్య కొన్ని భిన్నాభిప్రాయాలు ఉన్నాయి. శాట్కామ్ సంస్థలపై స్పెక్ట్రమ్ ఫీజును 4 శాతం బదులు 5 శాతం విధించాని ఈ నెల మొదట్లో డీవోటీ సూచించింది. అలాగే పట్టణ ప్రాంతాల్లో ఒక్కో కనెక్షన్పై రూ.500 ఫీజు విధించాలని చెప్పింది. ఈ రెండు ప్రతిపాదనలను ట్రాయ్ తిరస్కరించింది. ప్రస్తుతం ఈ రెండు ప్రతిపాదనలు టెలికాం రంగంలో అత్యున్నత నిర్ణయాధికార సంస్థ అయిన డిజిటల్ కమ్యూనికేషన్ కమిషన్(డీసీసీ)ముందు ఉన్నాయి. అవసరమైతే తుది నిర్ణయం కోసం కేబినెట్ అనుమతి కూడా తీసుకునే అవకాశం ఉంది. కాగా, డేటా విషయమై ఇప్పటికే ప్రజల్లో ఆందోళనలు నెలకొన్నాయి. వినియోగదారుల సమాచారం బయటికి వెళుతోందని ఆరోపణలు ఉన్నాయి. వీటి కారణంగానే.. ఇటీవల ప్రభత్వం ప్రతి మొబైల్లోనూ సంచార్ సాథీ యాప్ను తప్పనిసరి చేయడం, అలాగే లొకేషన్ ట్రాకింగ్పై తెచ్చిన నిబంధనలు తీవ్ర వ్యతిరేకతను ఎదుర్కొన్న విషయం తెల్సిందే. దీంతో వీటిపై కేంద్రం వెనక్కి తగ్గింది కూడా. ఈ క్రమంలో ప్రస్తుతం కేంద్రం శాటిలైట్ ఫోన్ సర్వీసులకు తెచ్చిన నిబంధనల్లో ఒకటైన డేటా లోకలైజేషన్ (డేటాను మనదేశంలోనే ఉంచడం)పై సంబంధిత కంపెనీలు అంగీకరిస్తాయా లేదా అనే దానిపై వాటి సేవలు ఆధారపడి ఉన్నాయి.
