కలం, వెబ్డెస్క్: అమెరికాలో తెలుగు వ్యక్తి స్థాపించిన గిగా ఏఐ స్టార్టప్ (Giga AI Startup) కు బెదిరింపులు ఎదురయ్యాయి. తాము అడిగినంత డబ్బు ఇవ్వకపోతే స్టార్టప్లోని డేటాను బయటపెట్టేస్తామని మెయిల్ ద్వారా బెదిరింపు లేఖ వచ్చినట్లు ‘గిగా’ స్టార్టప్ వ్యవస్థాపకుల్లో ఒకరు, సీఈవో వరుణ్ ఉమ్మడి(Varun Vummadi) ‘ఎక్స్’ వేదికగా వెల్లడించారు. ఈ మేరకు బెదిరింపు మెయిల్ స్క్రీన్షాట్ను ట్వీట్కు జత చేశారు. కొంతకాలంగా కొందరు వ్యక్తులు తన కంపెనీని బలవంతంగా స్వాధీనం చేసుకోవాలని ప్రయత్నిస్తున్నారని, అందులో భాగంగానే ఇప్పుడు బెదిరింపులకు పాల్పడుతున్నారని వరుణ్ తెలిపారు.
గుర్తు తెలియని క్రిప్టో అకౌంట్కు 3 మిలియన్ డాలర్లు పంపాలని, లేకపోతే కంపెనీలోని కీలకమైన సమాచారాన్ని బయటపెడతామంటున్నారని ఆవేదన వ్యక్తం చేశాడు. కంపెనీలో పనిచేసిన కొంతమంది వ్యక్తులే దీని వెనక ఉన్నట్లు ఆరోపించారు. కంపెనీ ప్రతిష్ఠను దెబ్బతీసేందుకు ఇప్పటికే సోషల్ మీడియా ద్వారా దుష్ర్పచారం చేస్తున్నారని మండిపడ్డారు. అయితే, తాము చూస్తూ ఊరుకోబోమని, ఈ పరిస్థితిని చక్కదిద్దేందుకు చట్టం, న్యాయం పరంగా ముందుకు వెళుతున్నట్లు చెప్పారు.
కాగా, జారెడ్ స్టీల్ అనే మాజీ ఉద్యోగి ఇటీవల గిగా (Giga AI Startup) పై అనేక ఆరోపణలు చేశారు. వర్క్ ఎన్విరాన్మెంట్, వర్క్–లైఫ్ బ్యాలెన్స్ సరిగా ఉండవని, రోజుకు 12 గంటలు పనిచేయిస్తారని, చెప్పిన శాలరీలు ఇవ్వరని ఆరోపించాడు. అయితే, అతను కేవలం ఒక్కరోజు మాత్రమే ‘గిగా’లో పనిచేయడం గమనార్హం. కాగా, జారెడ్ ఆరోపణలను ఇప్పటికే వరుణ్ ఖండించారు. ఆంధ్రప్రదేశ్లోని విజయవాడ వరుణ్ ఉమ్మడి సొంతూరు. ఐఐటీ ఖరగపూర్లో గ్రాడ్యుయేషన్ పూర్తి చేశారు. అమెరికాలోని స్టాన్ఫోర్డ్ యూనివర్సిటీలో ఉన్నతవిద్య పూర్తి చేశారు. అక్కడే ఏడాదికి రూ.4.3కోట్ల జీతం వచ్చే ఉద్యోగం కాదనుకొని, రెండేళ్ల కిందట ‘గిగా’ ఏఐ స్టార్టప్ స్థాపించాడు. ఏడాదిలోనే కంపెనీకి రూ.540కోట్ల పెట్టుబడుడులు వచ్చాయి. ఇటీవల సిరీస్ ఏ ఫండింగ్లో మరో 61 మిలియన్ల డాలర్ల ఫండింగ్ పొందాడు. ప్రస్తుతం గిగా చాలా పెద్ద కంపెనీలకు ఏఐ సేవలు అందిస్తోంది.
Read Also: బంగ్లా హింసపై అసదుద్దీన్ స్పందన.. ఏమన్నారంటే !
Follow Us On: Pinterest
