కలం, వెబ్డెస్క్: పిల్లలకు సోషల్ మీడియా వాడకుండా బ్యాన్ (Social media ban) విధించడంపై మద్రాస్ హైకోర్టు సంచలన ప్రకటన చేసింది. 16 ఏళ్లలోపు పిల్లలు సోషల్ మీడియా వాడకుండా ఆస్ట్రేలియాలో తెచ్చిన చట్టం లాంటిది మన దేశంలోనూ తేవాల్సిన అవసరం ఉందని అభిప్రాయపడింది. దీనిపై అవసరమైన చర్యలు తీసుకోవాలని కేంద్రానికి సూచించింది. ఆలోగా అశ్లీల కంటెంట్, చైల్డ్ ఫోర్నోగ్రఫీ దుష్ప్రభావాలపై పిల్లలకు అవగాహన కార్యక్రమాలు నిర్వహించాలని కేంద్ర, రాష్ట్ర ప్రభుత్వాలను ఆదేశించింది. ఇంటర్నెట్లో అసభ్య, అశ్లీల సమాచారం విచ్చలవిడిగా, సులభంగా అందుబాటులో ఉందని మద్రాస్ హైకోర్టు మధురై బెంచ్లో దాఖలైన పిటిషన్ను జస్టిస్ జయచంద్రన్, జస్టిస్ కె.రామకృష్ణన్లతో కూడిన ధర్మాసనం శుక్రవారం విచారించింది.
పదహారేళ్ల లోపు పిల్లలు ఫేస్బుక్, ఎక్స్, ఇన్స్టాగ్రామ్, టిక్టాక్ వంటి సోషల్ మీడియా మాధ్యమాలు వాడకుండా నిషేధిస్తూ (Social media ban) ఇటీవల ఆస్ట్రేలియా చట్టం చేసిన సంగతి తెలిసిందే. ఈ చట్టం పిల్లలు, వాళ్ల తల్లిదండ్రులపై ఆంక్షలు కాకుండా సోషల్ మీడియా మాధ్యమాలను అందించే కంపెనీల కట్టడికి ఉద్దేశించింది. ఈ చట్టం గురించి ప్రస్తావించిన మద్రాస్ హైకోర్ట్ మన దేశంలోనూ ఈ తరహా చట్టం తీసుకురావాల్సిన అవసరం ఉందని పేర్కొంది. ‘ఆస్ట్రేలియాలో చేసిన చట్టం లాంటి దానిని మన దేశంలోనూ తీసుకొచ్చే అవకాశాలను కేంద్రం పరిశీలించాలి. ఆ చట్టం కార్యరూపం దాల్చేవరకు చైల్డ్ ఫోర్నోగ్రఫీ దుష్ప్రభావాలపై సంబంధిత అధికారులు విస్తృతంగా అవగాహన కార్యక్రమాలు నిర్వహించాలి. దీని కోసం అందుబాటులో ఉన్న అన్ని రకాల సాధనాలను వాడుకోవాలి. అవసరమైన ప్రణాళికను బాలల హక్కుల రక్షణ సంస్థ తయారుచేసి, సమర్థంగా, నిబద్ధతతో అమలు చేయాలి.’ అని ధర్మాసనం పేర్కొంది.
చైల్డ్ ఫోర్నోగ్రఫీ, అశ్లీల కంటెంట్ నియంత్రణకు ఇంటర్నెట్ సర్వీస్ ప్రొవైడర్లు(ఐఎస్పీ) తగిన చర్యలు తీసుకుంటున్నారని వాళ్ల తరఫు లాయర్లు ధర్మాసనం దృష్టికి తెచ్చారు. దీనిపై న్యాయస్థానం సంతృప్తి చెందలేదు. ఇదే విషయాన్ని చెప్తూ.. పిల్లలకు అశ్లీల కంటెంట్ అందకుండా చేయడంలో తల్లిదండ్రులు, కుటుంబ సభ్యుల బాధ్యత కూడా ఉందని వ్యాఖ్యానించింది. దీనికోసం అవసరమైన యాప్ను తల్లిదండ్రులకు అందుబాటులో తీసుకొచ్చే అంశాన్ని పరిశీలించాలని సూచించింది. ‘పిల్లలపై అశ్లీల కంటెంట్ దుష్ప్రభావాలు చాలా ఎక్కువ. అందువల్ల దానిని ఎదుర్కోవాలంటే పిల్లల విషయంలో తల్లిదండ్రులు మరింత బాధ్యతగా ఉండాలి’ అని ధర్మాసనం స్పష్టం చేసింది.
Read Also: సితార బ్యానర్లో నాని కొత్త సినిమా.. డైరెక్టర్ ఎవరు?
Follow Us On: Instagram
