కలం, వెబ్ డెస్క్ : ఆంధ్రప్రదేశ్ రాజధాని అమరావతి వేదికగా ముఖ్యమంత్రి నారా చంద్రబాబు నాయుడు అధ్యక్షతన రాష్ట్ర మంత్రివర్గ సమావేశం (AP Cabinet Meeting) ప్రాధాన్యత సంతరించుకుంది. సచివాలయంలో ఉదయం 10:30 గంటలకు ప్రారంభం కానున్న ఈ భేటీలో రాష్ట్ర అభివృద్ధి, సంక్షేమ కార్యక్రమాలే ప్రధాన అజెండాగా మంత్రి మండలి సుదీర్ఘంగా చర్చించనుంది. ముఖ్యంగా రాష్ట్ర పునర్నిర్మాణంలో భాగమైన అమరావతి రాజధాని పనులు, ప్రతిష్టాత్మక పోలవరం ప్రాజెక్టు పురోగతిపై ఈ సమావేశంలో కీలక నిర్ణయాలు తీసుకోనున్నారు. వీటితో పాటు రాష్ట్రంలో పరిపాలనా సంస్కరణలను మరింత వేగవంతం చేయడం ద్వారా ప్రజలకు మెరుగైన సేవలు అందించేలా పలు కీలక మార్పులపై మంత్రివర్గం విస్తృతంగా చర్చించనుంది.
మరోవైపు ఉత్తరాంధ్ర ఆర్థిక ముఖచిత్రాన్ని మార్చనున్న భోగాపురం అంతర్జాతీయ విమానాశ్రయ ప్రారంభోత్సవ ఏర్పాట్లపై కేబినెట్ ప్రత్యేకంగా దృష్టి సారించింది. దీనికి తోడు త్వరలోనే రాష్ట్రంలో పర్యటించనున్న గౌరవ ప్రధానమంత్రి నరేంద్ర మోదీ పర్యటనకు సంబంధించిన ముందస్తు ఏర్పాట్లు, భద్రత, ఇతర అధికారిక కార్యక్రమాలపై ముఖ్యమంత్రి చంద్రబాబు నాయుడు మంత్రులు, ఉన్నతాధికారులతో కలిసి సమీక్ష నిర్వహించనున్నారు. ప్రజా సంక్షేమ పథకాల అమలు తీరును మరింత మెరుగుపరుస్తూనే, వివిధ శాఖల పరిధిలోని కీలక ప్రాజెక్టులకు పరిపాలనా అనుమతులు మంజూరు చేయడం ద్వారా రాష్ట్రాన్ని ప్రగతి పథంలో ముందుకు తీసుకెళ్లడమే లక్ష్యంగా ఈ మంత్రివర్గ సమావేశం సాగనుంది.
