కలం, సినిమా : పాన్ ఇండియా స్టార్ ప్రభాస్ (Prabhas) నటిస్తున్న భారీ యాక్షన్ ఎంటర్టైనర్ ‘స్పిరిట్’(Spirit) సినిమాకు సంబంధించి కీలక ప్రకటన వెలువడింది. ఈ చిత్ర కర్ణాటక పంపిణీ హక్కుల (Karnataka Distribution Rights) కోసం పీపుల్ మీడియా ఫ్యాక్టరీ సంస్థ, ఏషియన్ సురేష్ ఎంటర్టైన్మెంట్తో భాగస్వామ్యం కుదుర్చుకుంది. పీపుల్ మీడియా ఫ్యాక్టరీ ఈ విషయాన్ని అధికారికంగా ప్రకటించింది. ప్రభాస్ హీరోగా, సందీప్ రెడ్డి వంగా దర్శకత్వంలో తెరకెక్కుతున్న ఈ చిత్రానికి కర్ణాటకలో భారీ స్థాయిలో విడుదల చేసేందుకు రెండు సంస్థలు కలిసి పనిచేయనున్నాయి.
టి-సిరీస్ ఫిల్మ్స్ సమర్పణలో, భద్రకాళి పిక్చర్స్ భాగస్వామ్యంతో రూపొందుతున్న ఈ చిత్రాన్ని భూషణ్ కుమార్ నిర్మిస్తున్నారు. ప్రభాస్, సందీప్ రెడ్డి వంగా కలయికలో తొలిసారి వస్తున్న సినిమా కావడంతో ‘స్పిరిట్’పై భారీ అంచనాలు నెలకొన్నాయి. కర్ణాటకలో ప్రభాస్కు బలమైన మార్కెట్గా ఉండటంతో, అక్కడి ప్రేక్షకులకు భారీ థియేట్రికల్ అనుభూతిని అందించేందుకు ఏషియన్ సురేష్ ఎంటర్టైన్మెంట్, పీపుల్ మీడియా ఫ్యాక్టరీ ప్రత్యేక ప్రణాళికలతో ముందుకు సాగుతున్నాయి. ప్రపంచవ్యాప్తంగా 2027 మార్చి 5న ‘స్పిరిట్’ గ్రాండ్ థియేట్రికల్ రిలీజ్కు సిద్ధమవుతోంది. ప్రభాస్ అభిమానులు, సినీ ప్రేక్షకులలో ఈ సినిమాపై ఇప్పటికే భారీ ఆసక్తి నెలకొంది. సందీప్ రెడ్డి వంగా శైలిలో తెరకెక్కుతున్న ఈ చిత్రం యాక్షన్, ఎమోషన్తో కూడిన భారీ సినిమాటిక్ అనుభూతిని అందించనుందని చిత్ర బృందం తెలిపింది.
