కలం, వెబ్ డెస్క్: నేటి ఆధునిక కాలంలో బరువు తగ్గడం అనేది చాలా మందికి ఒక పెద్ద సవాలుగా మారింది. అయితే బరువు తగ్గాలనుకున్నవారు మొదటగా చేసే పని ఆహారంలో చక్కెర వినియోగాన్ని పూర్తిగా తగ్గించడం. దాని స్థానంలో ఆరోగర్యకరమైన తీపి ప్రత్యామ్నాయాలు వెతుక్కోవడం. ఈ సమయంలో అందరికీ గుర్తొచ్చేది బెల్లం, ఖర్జూరం. ఈ రెండూ సహజసిద్దమైన తీపిని అందించడమే కాకుండా శరీరానికి కావాల్సిన ఎన్నో పోషకాలను అందిస్తాయి. అయితే వెయిట్ లాస్ జర్నీలో ఈ రెండింటిలో (Dates vs Jaggery) ఏది బెస్ట్ అనే సందేహం చాలామందిలో ఉంటుంది. ఆరోగ్య నిపుణులు అభిప్రాయం ప్రకారం బరువు తగ్గే ప్రయాణంలో ఈ రెండింటి ప్రభావం ఎలా ఉంటుందో ఇప్పుడు తెలుసుకుందాం.
ఖర్జూరం, బెల్లం రెండింటిలోనూ శరీరానికి మేలు చేసే అద్భుతమైన పోషకాలు ఉన్నాయి.
పోషకాల వివరాలు
ఖర్జూరం: ఖర్జూరంలో విటమిన్లు, ఖనిజాలు, యాంటీ ఆక్సిడెంట్లు సమృద్ధిగా ఉంటాయి. ఇందులో ఉండే డైటర్ ఫైబర్ జీర్ణక్రియను మెరుగుపరుస్తుంది. అంతేకాకుండా, ఇది తిన్న వెంటనే రక్తంలో చక్కెర స్థాయిలు ఒక్కసారిగా పెరగకుండా నియంత్రిస్తుంది.
బెల్లం: ఇది చెరకు రసం లేదా తాటి రసం నుంచి తయారయ్యే ఒక సహజసిద్ధమైన తీపి పదార్థం. తయారీ ప్రక్రియలో బెల్లం తనలోని ఫైబర్ను కోల్పోతుంది. అయినప్పటికీ సాధారణ తెల్ల చక్కెరలో లభించని ఐరన్, పొటాషియం, మెగ్నీషియం వంటి ఖనిజాలు బెల్లంలో పుష్కలంగా ఉంటాయి.
ఆకలి నియంత్రణ
ఆకలిని నియంత్రించడంలోనూ, ఎక్కువసేపు కడుపు నిండిన అనుభూతిని కలిగించడంలోనూ ఖర్జూరాలదే పైచేయిగా చెప్పుకోవచ్చు. ఖర్జూరంలో ఉండే కరిగే పీచు పదార్థం జీర్ణవ్యవస్థలోకి వెళ్లాక నీటిని పీల్చుకుని ఉబ్బుతుంది. ఇది జీర్ణక్రియను నెమ్మదింపజేసి, ఎక్కువ సమయం ఆకలి వేయకుండా చూస్తుంది. ఫలితంగా, మనం అదనపు తీపి తీసుకోకుండా నియంత్రించవచ్చు. కానీ బెల్లంలో ఫైబర్ ఉండదు. కాబట్టి అది శరీరంలో త్వరగా జీర్ణమై రక్తంలో కలిసిపోతుంది. దీనివల్ల తిన్న కొద్దిసేపటికే మళ్లీ తీపి పదార్థాలు తినాలనే కోరిక కలిగే అవకాశం ఉందని చెబుతున్నారు నిపుణులు.
క్యాలరీల సాంద్రత – నియంత్రణ
ఖర్జూరం, బెల్లం రెండింటిలోనూ క్యాలరీలు ఎక్కువగా ఉంటాయి. కానీ మనం వీటిని తినే పరిమాణాన్ని బట్టి తేడా ఉంటుందని చెబుతున్నారు. సాధారణంగా ఖర్జూరాలను నమిలి తింటాం. దీని వల్ల 1 లేదా 2 ఖర్జూరాలు తినగానే తీపి కోరిక తీరిపోతుంది. కానీ, బెల్లాన్ని మాత్రం టీ, బ్రెడ్ లేదా స్వీట్లలో వేసుకోవడం వల్ల తెలియకుండానే ఎక్కువ మొత్తంలో తింటాం. కాబట్టి చిన్న బెల్లం ముక్క కూడా కడుపు నింపకుండానే ఎక్కువ క్యాలరీలను శరీరానికి చేరవేస్తుందని చెబుతున్నారు నిపుణులు.
బ్లడ్ షుగర్పై ప్రభావం
ఖర్జూరంలో ఫైబర్ (పీచు పదార్థం) పుష్కలంగా ఉంటుంది. కాబట్టి దీని గ్లైసిమిక్ ఇండెక్స్ (GI) తక్కువ నుండి మధ్యస్థంగా ఉంటుంది. ఇది రక్తంలో గ్లూకోజ్ స్థాయిలు ఒక్కసారిగా పెరగకుండా స్థిరంగా ఉంచుతుంది, తద్వారా హఠాత్తుగా వచ్చే ఆకలిని అడ్డుకుంటుంది. దీనికి విరుద్ధంగా, బెల్లంలో గ్లైసిమిక్ ఇండెక్స్ చాలా ఎక్కువగా ఉంటుంది. ఇది బ్లడ్ షుగర్ స్థాయిలను వేగంగా పెంచి, అంతే వేగంగా పడిపోయేలా చేస్తుంది. దీనివల్ల శరీరం త్వరగా అలసిపోయి, మళ్లీ మళ్లీ ఎక్కువ ఆహారం తినే ప్రమాదం ఉంటుందని చెబుతున్నారు నిపుణులు.
వంటల్లో వాడకం మరియు క్యాలరీల లెక్కింపు
ఖర్జూరాలను నేరుగా ఆరోగ్యకరమైన స్నాక్లా తినవచ్చు లేదా స్మూతీస్, ఓట్స్ పాయసంలో ముక్కలుగా కలుపుకోవచ్చు. దీనివల్ల మనం ఎన్ని ఖర్జూరాలు తింటున్నామో సులభంగా లెక్కించవచ్చు. కానీ బెల్లాన్ని సాధారణంగా వంటల్లో కరిగించి లేదా తురిమి వాడటం వల్ల, మనం ఎంత పరిమాణంలో తీసుకుంటున్నామో ఖచ్చితంగా తెలుసుకోవడం కష్టం. ఫలితంగా, బరువు తగ్గడానికి ముఖ్యమైన క్యాలరీల లెక్కింపు ఇందులో కొంత కష్టమవుతుంది.
చివరిగా… ఏది బెస్ట్?
బరువు తగ్గడమే మీ ప్రధాన లక్ష్యం అయితే, బెల్లంతో పోలిస్తే ఖర్జూరమే ఉత్తమమైన ఎంపిక అని చెబుతున్నారు ఆరోగ్య నిపుణులు. దీనిలో ఉండే అధిక ఫైబర్ (పీచు పదార్థం), తక్కువ గ్లైసిమిక్ ఇండెక్స్ బరువును అదుపులో ఉంచడానికి అద్భుతంగా తోడ్పడతాయట. బెల్లం తెల్ల చక్కెర కంటే ఎంతో ఆరోగ్యకరమైనదే అయినప్పటికీ, బరువు తగ్గే ప్రయాణంలో ఖర్జూరాలకే మొదటి ప్రాధాన్యత ఇవ్వడం మంచిదని చెబుతున్నారు. మీ వెయిట్ లాస్ డైట్లో బెల్లాన్ని కేవలం అప్పుడప్పుడు మాత్రమే, చాలా పరిమిత పరిమాణంలో వాడుకోవడం ఉత్తమం అని సూచిస్తున్నారు.
