కలం, భువనగిరి: కాళేశ్వరం ప్రాజెక్టు (Kaleshwaram) ద్వారా యాదాద్రి భువనగిరి జిల్లాకు గోదావరి జలాలను అందించడంలో కాంగ్రెస్ ప్రభుత్వం ఘోరంగా విఫలమైందని బీఆర్ఎస్ సీనియర్ నాయకులు, మాజీ ఎమ్మెల్యే బూడిద భిక్షమయ్య గౌడ్ తీవ్రస్థాయిలో ధ్వజమెత్తారు. యాదాద్రి భువనగిరి (Yadadri Bhuvanagiri) కలెక్టరేట్ ఎదుట బీఆర్ఎస్ చేపట్టిన మహాధర్నా (BRS Mahadharna) లో ఆయన పాల్గొని మాట్లాడారు.
సముద్రం పాలవుతున్న గోదావరి జలాలను జిల్లాకు మళ్లించకుండా ప్రభుత్వం కాలయాపన చేస్తోందని ఆయన మండిపడ్డారు. గోదావరి నది గుండా ప్రస్తుతం సుమారు లక్ష క్యూసెక్కుల జలాలు వృధాగా సముద్రంలోకి పోతున్నాయని, ఆ నీటిని తక్షణమే నిలిపివేసి నియోజకవర్గ అవసరాలకు వాడుకోవాలని డిమాండ్ చేశారు.
కన్నెపల్లి పంపుహౌజ్ (Kannepalli Pump House) నుండి గోదావరి జలాలను వెంటనే ఎత్తిపోయాలని (లిఫ్ట్ చేయాలని) ప్రభుత్వాన్ని కోరారు. కన్నెపల్లి నుండి ఎత్తిపోసిన నీటిని జిల్లాలోని ప్రధాన ప్రాజెక్టులైన గంధమల్ల, బస్వాపూర్ రిజర్వాయర్లకు తక్షణమే మళ్లించి రైతాంగాన్ని ఆదుకోవాలని స్పష్టం చేశారు. ప్రభుత్వ నిమ్మకు నీరెత్తిన వైఖరిపై భిక్షమయ్య గౌడ్ తీవ్ర ఆగ్రహం వ్యక్తం చేస్తూ.. “కాంగ్రెస్ పాలకులు పొలాలకు నీళ్ళు ఇస్తారా లేక గద్దె దిగుతారా?” అంటూ నిలదీశారు.
తెలంగాణను సస్యశ్యామలం చేసిన కాళేశ్వరం జలాలను ప్రజలకు ఇవ్వలేని ఈ ప్రభుత్వానికి అధికారంలో కొనసాగే అర్హత లేదని, వెంటనే సీఎం తన పదవికి రాజీనామా చేయాలని ఆయన డిమాండ్ చేశారు. పంటలు ఎండిపోతున్నా పట్టించుకోని పాలకులకు రాబోయే రోజుల్లో రైతాంగం తగిన బుద్ధి చెబుతుందని హెచ్చరించారు.
కలెక్టరేట్ ఎదుట బీఆర్ఎస్ శ్రేణులు భారీ ఎత్తున మహాధర్నా..
రాష్ట్రంలోని కాంగ్రెస్ ప్రభుత్వ వైఖరిని నిరసిస్తూ యాదాద్రి భువనగిరి జిల్లా కలెక్టరేట్ ఎదుట భారత రాష్ట్ర సమితి (BRS) శ్రేణులు భారీ ఎత్తున మహాధర్నా నిర్వహించాయి. జిల్లా నలుమూలల నుండి పార్టీ నాయకులు, కార్యకర్తలు, ప్రజాప్రతినిధులు పెద్ద సంఖ్యలో ఈ నిరసన కార్యక్రమానికి తరలివచ్చారు.
ధర్నా అనంతరం బీఆర్ఎస్ శ్రేణులు కలెక్టరేట్ ప్రధాన ద్వారం (మెయిన్ గేట్) వద్ద బైఠాయించి ముట్టడికి యత్నించడంతో అక్కడ ఉద్రిక్త వాతావరణం నెలకొంది. ప్రభుత్వానికి వ్యతిరేకంగా ప్లకార్డులు ప్రదర్శిస్తూ తమ నిరసనను చాటారు. నిరసన సందర్భంగా బీఆర్ఎస్ శ్రేణులు కాంగ్రెస్ ప్రభుత్వానికి, ముఖ్యమంత్రికి వ్యతిరేకంగా పెద్ద ఎత్తున నినాదాలు చేశారు. “వద్దురా నాయనా కాంగ్రెస్ పాలన”, “ఇదేమి రాజ్యం ఇదేమి రాజ్యం.. దొంగల రాజ్యం”, “చెట్టు మీది దొంగ కాంగ్రెస్ దొంగ”, “సీఎం డౌన్ డౌన్” అంటూ కలెక్టరేట్ పరిసరాలను హోరెత్తించారు.
కన్నెపల్లి పంపు హౌస్ నుంచి నీటిని విడుదల చేయాలి: బీఆర్ఎస్ డిమాండ్
రైతాంగాన్ని, ప్రజలను కాంగ్రెస్ ప్రభుత్వం తీవ్ర ఇబ్బందులకు గురిచేస్తోందని బీఆర్ఎస్ నాయకులు మండిపడ్డారు. తక్షణమే కన్నెపల్లి పంపు హౌస్ నుంచి నీటిని ఎత్తిపోసి (ప్యాసేజ్ ద్వారా విడుదల చేసి) ఎండిపోతున్న పంటలను, ప్రజల నీటి అవసరాలను తీర్చాలని వారు డిమాండ్ చేశారు.
ఈ మహాధర్నాలో మాజీ ఎమ్మెల్యే గొంగిడి సునీతా మహేందర్ రెడ్డి, మాజీ ఎమ్మెల్యే పైళ్ల శేఖర్ రెడ్డి, మాజీ ఎమ్మెల్యే బూడిద భిక్షమయ్య గౌడ్, బీఆర్ఎస్ జిల్లా అధ్యక్షుడు కంచర్ల రామకృష్ణారెడ్డి, రాష్ట్ర నాయకులు చింతల వెంకటేశ్వర్లు, క్యామ మల్లేష్, కల్లూరి రామచంద్రారెడ్డి, ఎలిమినేటి సందీప్ రెడ్డి, బీఆర్ఎస్వీ రాష్ట్ర ఉపాధ్యక్షుడు తుంగ బాలు, జిల్లాకు చెందిన ఇతర ముఖ్య నాయకులు, కార్యకర్తలు పాల్గొన్నారు. రైతుల సమస్యలపై ప్రభుత్వం స్పందించే వరకు తమ పోరాటం ఆగదని ఈ సందర్భంగా బీఆర్ఎస్ నాయకులు హెచ్చరించారు.
Read Also: హరీశ్.. పదేళ్లు ఏం చేశావ్?: మహేశ్ కుమార్ గౌడ్
Follow Us On: Instagram
