కలం, వెబ్ డెస్క్ : తెలంగాణ ముఖ్యమంత్రి రేవంత్ రెడ్డి (Revanth Reddy) నేడు పలు కీలక సమీక్షా సమావేశాలు, ప్రారంభోత్సవ కార్యక్రమాల్లో పాల్గొననున్నారు. రాష్ట్రంలోని కాంట్రాక్ట్, ఔట్సోర్సింగ్ ఉద్యోగులు ఎదుర్కొంటున్న సుదీర్ఘకాల సమస్యలపై మధ్యాహ్నం 12.00 గంటలకు ముఖ్యమంత్రి ఉన్నత స్థాయి సమీక్ష నిర్వహించనున్నారు. ఈ సమావేశంలో ఉద్యోగుల క్రమబద్ధీకరణ, వేతనాల పెంపు వంటి కీలక అంశాలపై చర్చించే అవకాశం ఉంది.
అనంతరం సాయంత్రం 4.30 గంటలకు నాచారంలోని తెలంగాణ ఫుడ్స్ ప్రాంగణానికి సీఎం చేరుకుంటారు. అక్కడ నూతనంగా ఏర్పాటు చేసిన బాలమృతం కొత్త ప్లాంట్ను ఆయన అధికారికంగా ప్రారంభించనున్నారు. చిన్న పిల్లలు, గర్భిణీ స్త్రీలకు పౌష్టికాహారాన్ని అందించే ఈ ప్లాంట్ ప్రారంభోత్సవం తర్వాత, సాయంత్రం 6.00 గంటలకు ప్రజా భవన్లో నిర్వహించే మరో ముఖ్యమైన కార్యక్రమానికి హాజరవుతారు. రాష్ట్రంలోని వివిధ నీటిపారుదల ప్రాజెక్టుల పురోగతి, ప్రస్తుత పరిస్థితిపై అధికారులు ఇచ్చే సమగ్ర ప్రజెంటేషన్ను ముఖ్యమంత్రి వీక్షించనున్నారు.
ఇక రోజంతా అధికారిక కార్యక్రమాలతో బిజీగా గడిపిన అనంతరం, సీఎం రేవంత్ రెడ్డి రాత్రి 9.30 గంటలకు శిల్పకళా వేదికకు చేరుకుంటారు. అక్కడ విద్యార్థులతో కలిసి ఫిఫా వరల్డ్ కప్ ఫుట్బాల్ మ్యాచ్ను ప్రత్యక్షంగా వీక్షించనున్నారు. యువతను, క్రీడాకారులను ప్రోత్సహించే ఉద్దేశంతో ముఖ్యమంత్రి ఈ మ్యాచ్ వీక్షణ కార్యక్రమంలో పాల్గొంటున్నట్లు అధికార వర్గాలు తెలిపాయి.
