కలం, స్పోర్ట్స్ : ఫిఫా (FIFA) ప్రపంచకప్లో అమెరికా జట్టుకు కీలక ఎదురుదెబ్బ తగిలింది. స్టార్ స్ట్రైకర్ ఫొలారిన్ బలోగన్కు చూపిన రెడ్ కార్డుపై అప్పీల్ చేసే అవకాశం లేదని ఫిఫా స్పష్టం చేసింది. దీంతో అతను బెల్జియంతో జరిగే ప్రీక్వార్టర్ మ్యాచ్కు దూరం కానున్నాడు. బోస్నియా అండ్ హెర్జెగోవినాతో జరిగిన రౌండ్ ఆఫ్ 32 మ్యాచ్లో బలోగన్ టారిక్ ముహరేమోవిచ్పై చేసిన టాకిల్ను రిఫరీ తొలుత రెడ్ కార్డుగా పరిగణించలేదు. అయితే వీడియో అసిస్టెంట్ రిఫరీ (వీఏఆర్) సూచనతో పిచ్సైడ్ మానిటర్లో ఘటనను మరోసారి పరిశీలించిన తర్వాత రెడ్ కార్డు చూపించాడు.
ఆ ఘటనతో అమెరికా 10 మంది ఆటగాళ్లతోనే మ్యాచ్ను కొనసాగించింది. అయినప్పటికీ మరో గోల్ చేసి రౌండ్ ఆఫ్ 16కు అర్హత సాధించింది. అయితే బలోగన్ లేకుండా బెల్జియంతో తలపడాల్సి రావడం అమెరికాకు ఇబ్బందికరంగా మారింది. ఈ ప్రపంచకప్లో ఇప్పటికే మూడు గోల్స్ చేసిన బలోగన్ అమెరికా తరఫున అత్యధిక గోల్స్ చేసిన ఆటగాడిగా ఉన్నాడు. మ్యాచ్ అనంతరం అమెరికా కోచ్ మౌరిసియో పోచెట్టినోతో పాటు పలువురు ఆటగాళ్లు రెడ్ కార్డు నిర్ణయం కఠినంగా ఉందని అభిప్రాయపడ్డారు.
అయితే ప్రస్తుత ప్రపంచకప్ నిబంధనల ప్రకారం అలాంటి నిర్ణయంపై అప్పీల్ చేసే అవకాశం లేదని ఫిఫా తెలిపింది. ఫిఫా నిబంధనల ప్రకారం నేరుగా రెడ్ కార్డు లేదా రెండో పసుపు కార్డు కారణంగా రెడ్ కార్డు పొందిన ఆటగాడు తదుపరి మ్యాచ్కు ఆటోమేటిక్గా సస్పెండ్ అవుతాడు. అవసరమైతే ఫిఫా క్రమశిక్షణ కమిటీ అదనపు మ్యాచ్ల నిషేధం కూడా విధించే అవకాశం ఉంటుంది. ఒకవేళ టోర్నీలో ఆ జట్టుకు ఇక మ్యాచ్లు లేకపోతే, ఆ నిషేధం తర్వాత జరిగే అధికారిక మ్యాచ్కు వర్తిస్తుందని కూడా ఫిఫా స్పష్టం చేసింది.
ఈ నేపథ్యంలో బలోగన్ ప్రస్తుతం బెల్జియంతో జరిగే మ్యాచ్కు దూరం కావడం ఖాయమైంది. అయితే అమెరికా తర్వాతి దశకు చేరితే, క్రమశిక్షణ కమిటీ నిర్ణయం ఆధారంగా అతనిపై నిషేధం మరింత పొడిగించే అవకాశం కూడా ఉంది.
