కలం, స్పోర్ట్స్: భారత క్రికెట్లో వేగంగా ఎదుగుతున్న యువ సంచలనం వైభవ్ సూర్యవంశీ (Vaibhav Sooryavanshi) మరోసారి వార్తల్లో నిలిచాడు. కేవలం 15 ఏళ్ల వయసులోనే భారత జట్టులో తొలి పిలుపు అందుకున్న అతడు, త్వరలో జరిగే ఇంగ్లండ్ వైట్బాల్ పర్యటనకు జట్టుతో కలిసి వెళ్లనున్నాడు. ఈ పర్యటనలో అతని కోసం ప్రత్యేక ఏర్పాట్లు చేయనున్నట్లు తాజా సమాచారం వెలుగులోకి వచ్చింది. బీహార్కు చెందిన ఈ యువ బ్యాటర్, శుక్రవారం బెల్ఫాస్ట్లో జరిగే ఐర్లాండ్తో తొలి టీ20 మ్యాచ్లో అవకాశం దక్కించుకుంటే భారత తరఫున అంతర్జాతీయ క్రికెట్ ఆడిన అత్యంత పిన్న వయస్కుడిగా చరిత్ర సృష్టించే అవకాశం ఉంది.
ప్రస్తుతం ఈ రికార్డు సచిన్ టెండూల్కర్ పేరిట ఉంది. భారత్ ముందుగా ఐర్లాండ్తో రెండు టీ20 మ్యాచ్లు ఆడనుంది. అనంతరం వచ్చే వారం నుంచి డర్హమ్లో ఇంగ్లండ్తో ఐదు మ్యాచ్ల టీ20 సిరీస్లో తలపడనుంది. అయితే ఈ పర్యటనలో వైభవ్ సాధారణ ఆటగాళ్లతో కలిసి డ్రెస్సింగ్ రూమ్ను ఉపయోగించలేడు. 16 ఏళ్లలోపు ఆటగాళ్లు పెద్దలతో కలిసి డ్రెస్సింగ్ రూమ్ సదుపాయాలను పంచుకోవడానికి ఐసీసీ నిబంధనలు, అలాగే ఇంగ్లండ్ క్రికెట్ బోర్డు విధానాలు అనుమతించవని సమాచారం.
దీంతో ప్రతి వేదికలో అతనికి ప్రత్యేక డ్రెస్సింగ్ రూమ్ ఏర్పాట్లు చేయనున్నారు. అన్ని నిబంధనలు సక్రమంగా అమలయ్యేలా ఈసీబీ, బీసీసీఐ కలిసి పనిచేస్తున్నట్లు తెలుస్తోంది. వైభవ్కు అవసరమైన సహాయం, సంరక్షణ అందించేందుకు అతని తల్లిదండ్రులు కూడా పర్యటనలో వెంట ఉండనున్నారని సమాచారం. సాధారణంగా జట్టుతో ఒకే హోటల్లో కుటుంబ సభ్యులు ఉండరు. అయితే అతని వయసును దృష్టిలో పెట్టుకుని ఈసారి ప్రత్యేక అనుమతి ఇచ్చినట్లు నివేదిక పేర్కొంది.
ఈసీబీ తెలిపిన వివరాల ప్రకారం, ఐసీసీ భద్రతా నిబంధనలతో పాటు తమ ‘సేఫ్ హ్యాండ్స్’ విధానం కూడా అమల్లో ఉంటుందని పేర్కొంది. ఆటగాడికి సంబంధించిన అన్ని అవసరాలు, వేదికల ఏర్పాట్లపై భారత జట్టు అధికారులతో సమన్వయం కొనసాగుతోందని వెల్లడించింది. ఇంగ్లండ్ క్రీడల్లో 16 ఏళ్లలోపు ఆటగాళ్లకు వేర్వేరు డ్రెస్సింగ్ రూమ్లు కల్పించడం సాధారణ పద్ధతిగా ఉంది. అయితే భారత్లో ఇలాంటి నిబంధన కనిపించదు.
గతంలో ఐపీఎల్లో రాజస్థాన్ రాయల్స్ తరఫున ఆడిన సమయంలో వైభవ్ (Vaibhav Sooryavanshi) తన సహచర ఆటగాళ్లతోనే సదుపాయాలను పంచుకున్నాడు. ఇప్పుడు అందరి దృష్టి అతని అంతర్జాతీయ అరంగేట్రంపైనే ఉంది. తొలి అవకాశం దక్కితే వైభవ్ మరో అరుదైన రికార్డును తన పేరిట నమోదు చేసుకునే అవకాశం ఉంది.
