కలం, వెబ్ డెస్క్: రాష్ట్ర ప్రభుత్వం ప్రతిష్ఠాత్మకంగా నిర్మిస్తున్న సనత్ నగర్ తెలంగాణ ఇన్స్టిట్యూట్ ఆఫ్ మెడికల్ సైన్సెస్ (TIMS)లో 184 తాత్కాలిక, కాంట్రాక్ట్ పోస్టుల భర్తీకి మూడు రకాల నోటిఫికేషన్లు జారీ చేసింది. టిమ్స్ నిర్వహణ బాధ్యతలను నిమ్స్కు అప్పగించడంతో ఈ మేరకు ప్రకటన విడుదల చేసింది. జులై ఆరో తేదీలోగా ఆయా పోస్టులకు దరఖాస్తు చేసుకోవాలని సూచించింది. ఇందులో మెడికల్ ఫ్యాకల్టీ పోస్టులకు మాత్రం ప్రత్యేక సెలెక్షన్ బోర్డు ఆధ్వర్యంలో ఇంటర్వ్యూ నిర్వహిస్తారు. తుది నిర్ణయం నిమ్స్ డైరెక్టర్ నిర్ణయానికి లోబడి ఉంటుంది. మిగతా పోస్టులకు రాత పరీక్ష నిర్వహించి తీసుకుంటారు.
ప్రొఫెసర్ పోస్టులు..
సనత్ నగర్ టిమ్స్ లో కాంట్రాక్ట్ పద్ధతిలో అయిదుగురు ప్రొఫెసర్లు, ఇద్దరు అసోసియేట్ ప్రొఫెసర్లు, 24 మంది అసిస్టెంట్ ప్రొఫెసర్ల పోస్టులకు నోటిఫికేషన్ విడుదల చేశారు. ప్రొఫెసర్ కు నెలవారీ వేతనం రూ.2.20 లక్షలు, అసోసియేట్ ప్రొఫెసర్ కు రూ.1.88 లక్షలు, అసిస్టెంట్ ప్రొఫెసర్ కు రూ.1.42 లక్షలు ఇస్తామని పేర్కొన్నారు. ఈ పోస్టులకు కచ్చితంగా బోధనా అనుభవం ఉండాలి. అంతేగాకుండా డీఎం లేదా ఎంసీహెచ్ లేదా డీఎన్ బి వంటి విద్యార్హతలు ఉండాలి. గరిష్ఠ వయోపరిమితి 50 నుంచి 58 సంవత్సరాల వరకు ఉంది. రిజర్వేషన్ వర్గాల వారికి సడలింపులు కూడా ఉన్నాయి.
ఐటీ, సెక్యూరిటీ విభాగాల్లో..
టిమ్స్ ఆసుపత్రిలో ఐటీ, ఇంజినీరింగ్, హెల్త్ కేర్, టెక్నికల్ సర్వీసులతో పాటు సెక్యూరిటీ, అడ్మినిస్ట్రేటివ్ విభాగాల్లో మరో 31 పోస్టులు భర్తీ చేయబోతుంది. ఆయా విభాగాలకు సంబంధించి డిప్లొమా, డిగ్రీ, పీజీ, బీ.టెక్, ఎమ్మెస్సీ వంటి విద్యార్హతలు ఉండాలి. అప్పుడే దరఖాస్తులను పరిగణలోకి తీసుకుంటారు.
టెక్నికల్, అడ్మినేస్ట్రేటివ్ విభాగాల్లో..
టిమ్స్ ఆసుపత్రి నిర్వహణలో ఆత్యంత కీలకమైన టెక్నికల్ విభాగంలో 98 పోస్టులు, అడ్మినిస్ట్రేటివ్ విభాగంలో 24 పోస్టులను కాంట్రాక్ట్ పద్థతిలో భర్తీ చేయబోతున్నారు. ఇందుకు సంబంధించిన విద్యార్హతల వివరాలను వెబ్సైట్లో పొందుపరిచారు.
