కలం, నల్లగొండ: ప్రజా సమస్యలను పరిష్కరించడంలో కేంద్ర, రాష్ట్ర ప్రభుత్వాలు పూర్తిగా నిర్లక్ష్యం వహిస్తున్నాయని సీపీఎం రాష్ట్ర కమిటీ సభ్యులు, మాజీ ఎమ్మెల్యే జూలకంటి రంగారెడ్డి (Julakanti Ranga Reddy) విమర్శించారు. ప్రస్తుత సాగు సీజన్ ప్రారంభమైన నేపథ్యంలో రైతులకు ఎదురవుతున్న ఇబ్బందులు, ప్రజా సమస్యలపై రాబోయే రోజుల్లో పెద్ద ఎత్తున ఉద్యమాలు చేపడతామని ఆయన స్పష్టం చేశారు.
జూలై, ఆగస్టు నెలల్లో జిల్లావ్యాప్తంగా ప్రజా సమస్యలపై పోరాటాలకు సీపీఎం సిద్ధమవుతోందని ప్రకటించారు. నూతన సాగు సీజన్ ప్రారంభమైనందున అర్హులైన రైతులకు రైతు భరోసా (Rythu Bharosa) నిధులను వెంటనే విడుదల చేయాలని సీపీఎం డిమాండ్ చేసింది. రైతులకు ఎక్కడా కొరత లేకుండా నాణ్యమైన ఎరువులు, విత్తనాలను అందుబాటులో ఉంచాలని ప్రభుత్వానికి సూచించారు.
యాప్ల ఆధారంగా ఎరువుల విక్రయాలు జరపడం వల్ల సామాన్య రైతులకు తీవ్ర ఇబ్బందికరంగా మారిందని, అన్ని ఎరువుల దుకాణాల్లో యూరియా, డీఏపీ నిరంతరాయంగా సరఫరా అయ్యేలా ప్రభుత్వం చర్యలు తీసుకోవాలని డిమాండ్ చేశారు. బ్యాంకులు పంటల స్కేల్ ప్రకారం రైతులకు పూర్తి స్థాయిలో రుణాలు మంజూరు చేయాలని కోరారు.
అటవీ భూముల్లో సాగు చేసుకుంటున్న పేద రైతులపై అటవీ శాఖ అధికారుల వేధింపులను తక్షణమే ఆపాలని స్పష్టం చేశారు. రాష్ట్రంలో వ్యవసాయం, విద్య, వైద్య రంగాల దుస్థితిపై ప్రభుత్వం తక్షణమే శ్వేతపత్రం విడుదల చేయాలని జూలకంటి రంగారెడ్డి (Julakanti Ranga Reddy) డిమాండ్ చేశారు. ప్రభుత్వ పాఠశాలలను బలోపేతం చేయకుండా, వాటిని మూసివేసే దిశగా ప్రభుత్వం తీసుకుంటున్న చర్యలు ఎంతమాత్రం సరికాదన్నారు.
కేంద్ర ప్రభుత్వం పూర్తిగా కార్పొరేట్ శక్తులకు అనుకూల విధానాలను అవలంబిస్తోందని సీపీఎం ఆరోపించింది. లేబర్ కోడ్స్ పేరుతో కార్మికుల హక్కులపై దాడులు జరుగుతున్నాయని, ప్రభుత్వ రంగ సంస్థల ప్రైవేటీకరణ వల్ల ఉద్యోగ భద్రత పూర్తిగా దెబ్బతింటుందని ఆందోళన వ్యక్తం చేశారు. రాష్ట్రంలో అధికారంలో ఉన్న కాంగ్రెస్ ప్రభుత్వం ఎన్నికల సమయంలో ఇచ్చిన హామీలను అమలు చేయడంలో పూర్తిగా విఫలమైందని సీపీఎం విమర్శించింది.
జిల్లా అభివృద్ధిపై ముఖ్యమంత్రి స్పష్టమైన ప్రకటన చేయాలని, అవసరమైన నిధులను తక్షణమే కేటాయించాలని డిమాండ్ చేశారు. ప్రజా సమస్యల పరిష్కారం కోసం ప్రజలను సమీకరించి క్షేత్రస్థాయిలో పోరాటాలు ఉధృతం చేస్తామని సీపీఎం నాయకత్వం హెచ్చరించింది.
Read Also: దేవాలయంలో ప్రదక్షిణ ఎందుకు చేస్తారు? పండితుల వివరణ ఇదే!
Follow Us On: Instagram
