కలం, స్పోర్ట్స్ : ఫిఫా వరల్డ్కప్ (FIFA World Cup) వేదికపై ఇరాన్ ఫుట్బాల్ జట్టు వదిలిన ఒక నోట్ ఇప్పుడు ప్రపంచవ్యాప్తంగా చర్చనీయాంశమైంది. బెల్జియంతో జరిగిన గ్రూప్ మ్యాచ్ అనంతరం డ్రెస్సింగ్ రూమ్ను విడిచిపెడుతూ ఇరాన్ ఆటగాళ్లు శాంతి, గౌరవం, స్నేహబంధం గురించి సందేశం రాసి వెళ్లారు. అయితే ఈ నోట్ వెనుక కేవలం కృతజ్ఞత మాత్రమే కాదు, గత కొన్ని రోజులుగా ఎదుర్కొన్న పరిస్థితుల ప్రతిబింబం కూడా కనిపించింది. లాస్ ఏంజెల్స్ స్టేడియంలో బెల్జియంతో మ్యాచ్ ముగిసిన తర్వాత ఇరాన్ జట్టు డ్రెస్సింగ్ రూమ్లో ఒక చేతిరాత సందేశాన్ని ఉంచింది.
వేల ఏళ్ల చరిత్ర కలిగిన పురాతన పర్షియా నుంచి నేటి నాగరిక ఇరాన్ వరకు తమ దేశ ఆత్మ ఎప్పటికీ సజీవంగానే ఉందని ఆ సందేశంలో పేర్కొన్నారు. గర్వంగా లాస్ ఏంజెల్స్కు వచ్చి, గౌరవంగా పోటీపడి, అదే గౌరవంతో వెళ్తున్నామని తెలిపారు. ఆతిథ్యానికి లాస్ ఏంజెల్స్కు కృతజ్ఞతలు తెలుపుతూ, తమకు మద్దతుగా నిలిచిన ప్రతి ఇరానీయుడికి ధన్యవాదాలు తెలిపారు. ప్రపంచ దేశాల మధ్య శాంతి, పరస్పర గౌరవం, స్నేహం నెలకొనాలని ఆకాంక్షించారు.
ఈ సందేశం వెనుక ఉన్న కారణాలు గత కొన్ని రోజుల పరిణామాల్లో కనిపించాయి. బెల్జియంతో మ్యాచ్కు ముందు ప్రయాణ పరిమితుల విషయంలో ఇరాన్ ఫుట్బాల్ సమాఖ్య అసంతృప్తి వ్యక్తం చేసింది. ఈ అంశంపై ఫిఫాకు ఫిర్యాదు చేయాలని కూడా భావించినట్లు వెల్లడించింది. ప్రస్తుతం ఇరాన్ జట్టు మెక్సికోలో బస చేస్తోంది. టోర్నీలో మ్యాచ్ ఉన్నప్పుడు మాత్రమే అమెరికాలోకి ప్రవేశించేందుకు అనుమతి ఉంది. మ్యాచ్కు ఒక రోజు ముందు అమెరికాకు వచ్చి, మ్యాచ్ ముగిసిన రోజే తిరిగి వెళ్లాల్సిన పరిస్థితి వారికి ఎదురైంది. ఈ పరిమితులపై ఇరాన్ ఫుట్బాల్ సమాఖ్య పలుమార్లు అభ్యంతరం వ్యక్తం చేసింది.
ఈ నేపథ్యంలో జట్టు ప్రధాన కోచ్ అమీర్ ఘలెనోయీ కూడా టోర్నీలో తమ జట్టే అత్యంత ఇబ్బందులు ఎదుర్కొంటోందని వ్యాఖ్యానించినట్లు సమాచారం. అమెరికా-ఇరాన్ మధ్య కొనసాగుతున్న ఉద్రిక్తతల నేపథ్యంలో ఈ ప్రయాణ నిబంధనలు అమల్లో ఉన్నాయని తెలుస్తోంది. ఇదే సమయంలో ఇరాన్ జట్టుపై అమలవుతున్న కఠిన ప్రయాణ పరిమితులను అమెరికా ప్రభుత్వం సమీక్షిస్తున్నట్లు కూడా నివేదికలు వెల్లడించాయి. ఈ పరిణామాల మధ్యనే ఇరాన్ జట్టు డ్రెస్సింగ్ రూమ్లో వదిలిన శాంతి సందేశం మరింత ప్రాధాన్యం సంతరించుకుంది.
మ్యాచ్ ముగిసిన తర్వాత మిగిలింది కేవలం ఫుట్బాల్ ఫలితం మాత్రమే కాదు. కష్టమైన పరిస్థితులను ఎదుర్కొన్న జట్టు నుంచి వచ్చిన ఒక సందేశం కూడా. ప్రపంచ దేశాల మధ్య గౌరవం, స్నేహం, శాంతి నెలకొనాలన్న ఇరాన్ జట్టు ఆకాంక్ష ఆ నోట్ ద్వారా మరోసారి వెలుగులోకి వచ్చింది.
