కలం, వెబ్ డెస్క్ : డేటింగ్ ప్రపంచంలో మరో కొత్త పదం తెరపైకి వచ్చింది. Gen Zలో ఇప్పుడు ఎక్కువగా వినిపిస్తున్న మాట ‘6-7 డేటింగ్’ (6-7 Dating). సోషల్ మీడియాలో విస్తృతంగా చర్చకు వస్తున్న ఈ ట్రెండ్, సంప్రదాయ డేటింగ్ నిర్వచనాలను సవాల్ చేస్తోంది. యువత ఎదుర్కొంటున్న డేటింగ్ యాప్లు, ఎన్నో ఎంపికలు, స్పష్టతలేని సంబంధాల మధ్య ఒక మధ్యస్థ స్థితిని వివరించేందుకు ఈ పదాన్ని ఉపయోగిస్తున్నారు. డేటింగ్, కమిట్మెంట్, లేదా కేవలం మాట్లాడుకోవడం వంటి లేబుల్స్లో సరిపోని సంబంధాలను ఇది సూచిస్తోంది.
6-7 డేటింగ్ అంటే సంపూర్ణమైన ‘10’ అనిపించని, కానీ టాక్సిక్ సంబంధం కూడా కాని ఒక ఎంపిక. భావోద్వేగ భద్రత, స్థిరత్వం, దయ, నమ్మకం ఉంటాయి. అయితే సినిమాల్లా తీవ్రమైన ప్రేమ లేదా ఆకర్షణ ఉండదు. డేటింగ్ యాప్ల ప్రభావంతో ఎప్పుడూ పోలికలు, సిట్యుయేషన్షిప్ల వల్ల కలిగే మానసిక అలసట వల్ల చాలామంది యువత ప్రస్తుతం ప్రశాంతతను కోరుకుంటున్నారు. ఊహించగలిగే సంబంధాలు ముఖ్యమవుతున్నాయి.
ఈ ధోరణిపై కౌన్సెలింగ్ సైకాలజిస్ట్ అతుల్ రాజ్ స్పందించారు. సరైన ఆలోచనతో, అనుభవం ఆధారంగా 6-7 పార్ట్నర్ను ఎంచుకుంటే అది ఎమోషనల్ మెచ్యూరిటీకి సంకేతం అవుతుందని చెప్పారు. భావోద్వేగ కలతలు, సామాజిక ఒత్తిళ్ల నుంచి బయటపడిన యువత స్థిరత్వం, గౌరవాన్ని ప్రాధాన్యంగా చూస్తున్నారని తెలిపారు.
అయితే, ఈ ఎంపిక వెనుక ఉన్న ఎమోషనల్ వాల్యూను చాలామంది గమనించరని ఆయన పేర్కొన్నారు. ఇంకా కావాలి అనే ఎక్కువ కోరుకునే శక్తి తగ్గిపోయి, ప్రమాదానికి భయపడి సంబంధాన్ని ఎంచుకుంటే అది రాజీగా మారుతుందని చెప్పారు. చికిత్సలో, ‘బాగానే ఉంది కానీ జీవం లేదు’ అనే భావనను చాలామంది వ్యక్తపరిచినట్లు రాజ్ తెలిపారు. డేటింగ్ యాప్లు వేగవంతమైన, తాత్కాలిక సాన్నిహిత్యాన్ని సాధారణం చేశాయని, స్పష్టత లేకపోవడం యువతను మానసికంగా అస్థిరపరుస్తోందని రాజ్ వివరించారు.
ఈ పరిస్థితుల్లో తక్కువ ఎక్సైట్మెంట్ ఉన్న సంబంధాలు మనసుకు ఉపశమనం ఇస్తున్నాయని అన్నారు. అయితే, ప్రశాంతతను సంపూర్ణ తృప్తిగా భావించడం ప్రమాదకరమని ఆయన సూచించారు. నిజమైన ఆరోగ్యకరమైన సంబంధం అంటే తీవ్రతను తప్పించుకోవడం కాదు, దానిని ఎదుర్కొనే సామర్థ్యాన్ని పెంచుకోవడమేనని చెప్పారు. 6-7 డేటింగ్ (6-7 Dating Trend) ట్రెండ్ యువత భావోద్వేగ మార్పులకు ఒక ప్రతిబింబంగా మారుతోంది.
