కలం, వెబ్ డెస్క్: తెలంగాణ పోలీసు (Telangana Police) సిబ్బందికి రాష్ట్ర ప్రభుత్వం శుభవార్త చెప్పింది. వారి సంక్షేమాన్ని దృష్టిలో ఉంచుకొని కీలక నిర్ణయం తీసుకున్నది. పోలీసులకు పుట్టిన రోజు, వివాహ వార్షికోత్సవం రోజున సెలవు మంజూరు చేస్తూ ఉత్తర్వులు జారీ చేసింది. ఈ మేరకు తెలంగాణ డీజీపీ బీ శివధర్ రెడ్డి సర్క్యులర్ విడుదల చేశారు.
పోలీసుల విధులు అత్యంత కఠినమైనవని, విధి నిర్వహణలో వారు ఎన్నో వ్యక్తిగత త్యాగాలు చేస్తున్నారని శివధర్ రెడ్డి పేర్కొన్నారు. పోలీసుల్లో మనోబలాన్ని పెంచేందుకు ఈ నిర్ణయం తీసుకున్నట్లు తెలిపారు. కుటుంబ సభ్యులతో కలిసి ముఖ్యమైన వ్యక్తిగత సందర్భాలను గడపడానికి ఈ అవకాశం కల్పించామన్నారు. తద్వారా వర్క్ లైఫ్, పర్సనల్ లైఫ్ కొంతమేర బ్యాలెన్స్ అవుతుందని పేర్కొన్నారు.
అయితే ఈ సెలవును హక్కుగా పరిగణించరాదని స్పష్టం చేశారు. అత్యవసర పరిస్థితులు మినహా, అధికారులు తప్పనిసరిగా సెలవు మంజూరు చేయాలని ఆదేశించారు. సంబంధిత ఉద్యోగి ముందస్తుగా లిఖిత పూర్వకంగా దరఖాస్తు చేయడం, అలాగే సర్వీస్ రిజిస్టర్లో ఉన్న వివరాల ప్రకారం ధృవీకరణ ఉండాల్సి ఉంటుంది. ఈ ఆదేశాలను రాష్ట్రంలోని అన్ని పోలీసు యూనిట్లకు పంపించి, తక్షణం అమలు చేయాలని సూచించారు.
