కలం, స్పోర్ట్స్ : ఆసియా గేమ్స్ క్వార్టర్ఫైనల్కు (Asian Games Quarterfinal) ముందు భారత జట్టుకు వర్షం పెద్ద అడ్డంకిగా మారింది. అఫ్గానిస్థాన్తో సోమవారం క్వార్టర్ఫైనల్ మ్యాచ్ జరగాల్సి ఉండగా.. భారీ వర్షాల కారణంగా టీమిండియా ప్రాక్టీస్కు అంతరాయం ఏర్పడింది. అయితే వర్షాన్ని సాకుగా చూపబోమని కెప్టెన్ శ్రేయస్ అయ్యర్ (Shreyas Iyer) స్పష్టం చేశాడు. ఆదివారం కూడా భారత జట్టుకు పూర్తిస్థాయిలో ప్రాక్టీస్ చేసే అవకాశం లభించలేదు. భారీ వర్షం కురిసినప్పటికీ అందుబాటులో ఉన్న సమయాన్ని ఆటగాళ్లు పూర్తిగా వినియోగించుకున్నారు. వార్మప్తో పాటు కొంత బ్యాటింగ్ ప్రాక్టీస్ చేశారు. బౌలర్లు కూడా మైదానంలో బౌలింగ్ చేశారు. పిచ్ పరిస్థితులకు వీలైనంత త్వరగా అలవాటు పడేందుకు ప్రయత్నించారు.
మ్యాచ్ జరగనున్న నిషిన్లోనూ వర్షం ప్రభావం కొనసాగుతోంది. శుక్రవారం అక్కడ జరిగిన రెండు మ్యాచ్లు వర్షం కారణంగా రద్దయ్యాయి. సోమవారం భారత్-అఫ్గానిస్థాన్ మ్యాచ్కు కూడా వర్షం అంతరాయం కలిగించే అవకాశం ఉంది. మ్యాచ్ రద్దయితే మెరుగైన ఐసీసీ టీ20 ర్యాంకింగ్ ఆధారంగా భారత్ నేరుగా సెమీఫైనల్కు చేరే అవకాశం ఉంటుంది. అయితే వర్షం కోసం ఎదురుచూడకుండా మ్యాచ్ ఆడటమే తమ ప్రధాన లక్ష్యమని శ్రేయస్ అయ్యర్ తెలిపాడు. పరిస్థితులు కఠినంగా ఉన్నప్పటికీ అందుబాటులో ఉన్న అవకాశాలను పూర్తిగా వినియోగించుకోవాలని జట్టు భావిస్తోందని చెప్పాడు. జపాన్లోని పరిస్థితులకు త్వరగా అలవాటు పడుతూ మ్యాచ్పై పూర్తి దృష్టి పెట్టాలని ఆటగాళ్లకు సూచించినట్లు అయ్యర్ పేర్కొన్నాడు. పరిస్థితులు ఎలా ఉన్నా మానసికంగా సిద్ధంగా ఉండటమే తమ లక్ష్యమని స్పష్టం చేశాడు.
