కలం, ఖమ్మం బ్యూరో : క్షణకాలం క్రితం వరకు పక్కనే నిలబడి మాట్లాడాడు.. ఇంటికి వెళ్దామని ద్విచక్ర వాహనం ఎక్కేలోపే మృత్యువు లారీ రూపంలో వచ్చి కబళించింది. భద్రాద్రి కొత్తగూడెం జిల్లా ములకలపల్లి మండల కేంద్రంలో శనివారం చోటుచేసుకున్న ఈ ఘోర రోడ్డు ప్రమాదం (Road Accident) స్థానికులను తీవ్ర దిగ్భ్రాంతికి గురిచేసింది.
స్థానికుల కథనం ప్రకారం… సాయిబాబా అనే వ్యక్తి తన పని ముగించుకుని ఇంటికి వెళ్లేందుకు రోడ్డు మలుపు వద్ద వేచి చూస్తున్నాడు. అదే సమయంలో స్కూటీపై వస్తున్న ఓ పరిచయస్థుడిని చూసి మాట్లాడాడు. అనంతరం అతనితో కలిసి వెళ్లేందుకు స్కూటీ ఎక్కే ప్రయత్నం చేస్తుండగా అకస్మాత్తుగా కాలు జారీ కింద పడిపోయాడు. సరిగ్గా అదే క్షణంలో వెనుక నుంచి వచ్చిన టిప్పర్ లారీ (Tipper Lorry) సాయిబాబా పైనుంచి దూసుకెళ్లింది. ఈ ఘోర ప్రమాదంలో లారీ చక్రాల కింద నలిగిపోయిన సాయిబాబా అక్కడికక్కడే దుర్మరణం చెందాడు.
కళ్లముందే జరిగిన ఈ దృశ్యాన్ని చూసి స్థానికులు ఉలిక్కిపడ్డారు. మృత్యువు ఏరూపంలో వస్తుందో తెలియదనడానికి అద్దం పట్టిన ఈ ప్రమాద దృశ్యాలన్నీ సమీపంలోని సీసీటీవీ (CCTV) కెమెరాలో స్పష్టంగా రికార్డయ్యాయి. సమాచారం అందుకున్న పోలీసులు సంఘటనా స్థలానికి చేరుకుని మృతదేహాన్ని పరిశీలించారు. ప్రమాదంపై కేసు నమోదు చేసుకుని, మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించి దర్యాప్తు జరుపుతున్నారు.
