కలం, వెబ్ డెస్క్ : ఐపీఎల్లో పరుగుల వరద పారింది. సిక్సర్ల మోతతో స్టేడియం దద్దరిల్లింది. ముంబై ఇండియన్స్ ఓపెనర్ రికెల్టన్ ఆకాశమే హద్దుగా చెలరేగి అద్భుత సెంచరీ బాదినప్పటికీ, సన్రైజర్స్ హైదరాబాద్ సమష్టి పోరాటం (MI vs SRH) ముందు ఆ ఇన్నింగ్స్ వెలవెలబోయింది. 244 పరుగుల భారీ లక్ష్యాన్ని ఛేదించడంలో హైదరాబాద్ ఏమాత్రం తడబడకుండా, మరో 8 బంతులు మిగిలి ఉండగానే 6 వికెట్ల తేడాతో ఘన విజయాన్ని అందుకుంది.
ముందుగా బ్యాటింగ్ చేసిన ముంబై ఇండియన్స్ నిర్ణీత 20 ఓవర్లలో 5 వికెట్ల నష్టానికి 243 పరుగుల భారీ స్కోరు సాధించింది. ఓపెనర్ రికెల్టన్ (55 బంతుల్లో 123; 10 ఫోర్లు, 8 సిక్సర్లు) ఆరంభం నుంచే హైదరాబాద్ బౌలర్లపై విరుచుకుపడ్డాడు. విల్ జాక్స్ (46) అతనికి మంచి సహకారం అందించగా, చివర్లో హార్దిక్ పాండ్యా (31) మెరుపులు మెరిపించాడు. హైదరాబాద్ బౌలర్లలో ప్రఫుల్ హింగే రెండు వికెట్లు తీయగా, నితీష్ కుమార్ రెడ్డి, మలింగ, సాకిబ్ హుస్సేన్ తలో వికెట్ పడగొట్టారు.
అనంతరం కొండంత లక్ష్యంతో బరిలోకి దిగిన సన్రైజర్స్కు ఓపెనర్లు అభిషేక్ శర్మ (45), ట్రావిస్ హెడ్ (76) అదిరిపోయే ఆరంభాన్ని ఇచ్చారు. హెడ్ కేవలం 30 బంతుల్లోనే 8 సిక్సర్లతో ముంబై బౌలర్ల పని పట్టాడు. మధ్యలో ఇషాన్ కిషన్ డకౌట్ అయినా.. హెన్రిచ్ క్లాసెన్ (30 బంతుల్లో 65 నాటౌట్) బాధ్యతాయుతమైన ఇన్నింగ్స్తో జట్టును గెలుపు తీరాలకు చేర్చాడు. చివర్లో సలీల్ అరోరా (10 బంతుల్లో 30 నాటౌట్) మూడు సిక్సర్లతో విరుచుకుపడి మ్యాచ్ను ముగించాడు. ముంబై బౌలర్లలో గజన్ఫర్ రెండు వికెట్లు తీసినప్పటికీ, భారీగా పరుగులు సమర్పించుకోవడంతో ఓటమి తప్పలేదు. ఈ విజయంతో సన్రైజర్స్ తన పాయింట్ల పట్టికలో స్థానాన్ని మరింత మెరుగుపరుచుకుంది.
