కలం, నిజామాబాద్ బ్యూరో: నిజామాబాద్ జిల్లా ఎడపల్లి మండలం కుర్నాపల్లి గ్రామంలో ఆదివారం నిర్వహించిన ‘మా ఇందిరమ్మ ఇంట్లో దీపావళి’ కార్యక్రమంలో జిల్లా కలెక్టర్ ఇలా త్రిపాఠి (Ila Tripathi), అదనపు కలెక్టర్ భుజంగరావు పాల్గొన్నారు. ఇందిరమ్మ ఇళ్ల పథకం కింద ఇంటి నిర్మాణం పూర్తి చేసుకున్న లబ్ధిదారు లిఖిత ఇంట్లో ఆమె కుటుంబ సభ్యులతో కలిసి దీపావళి వేడుకల్లో పాల్గొన్నారు. లబ్ధిదారుకు, ఆమె కుటుంబ సభ్యులకు కలెక్టర్ దీపావళి పండుగ శుభాకాంక్షలు తెలియజేశారు.
కలెక్టర్‌తో పాటు అధికారులు, ప్రజాప్రతినిధులు, లబ్ధిదారులు కలిసి సంప్రదాయబద్ధంగా పూజలు నిర్వహించిన అనంతరం బాణాసంచా కాలుస్తూ దీపావళి సంబరాలను జరుపుకున్నారు. ప్రభుత్వ ఆర్థిక సహకారంతో సొంతింటి కలను సాకారం చేసుకున్న తమ ఇంట్లో తొలి దీపావళి పండుగను జిల్లా ఉన్నతాధికారులు, ప్రజాప్రతినిధులతో కలిసి జరుపుకోవడం పట్ల లబ్ధిదారులు, వారి కుటుంబ సభ్యులు హర్షం వ్యక్తం చేస్తూ ప్రభుత్వానికి కృతజ్ఞతలు తెలిపారు.
ఈ సందర్భంగా కలెక్టర్ ఇలా త్రిపాఠి (Ila Tripathi) మాట్లాడుతూ, ప్రతి కుటుంబానికి సొంత ఇల్లు కలిగి ఉండటం చిరకాల వాంఛ అని అన్నారు. ఈ విషయాన్ని గుర్తించిన ప్రభుత్వం ప్రతిష్టాత్మకంగా ఇందిరమ్మ ఇళ్ల పథకాన్ని అమలు చేస్తోందని తెలిపారు. ఎవరికి రూపాయి కూడా ఇవ్వాల్సిన అవసరం లేకుండా పూర్తి పారదర్శకంగా పథకాన్ని అమలు చేస్తున్నామని, నేరుగా లబ్ధిదారుల బ్యాంకు ఖాతాల్లో ఇంటి నిర్మాణ ప్రగతిని అనుసరిస్తూ నాలుగు దశలలో రూ.5 లక్షల చొప్పున ఆర్థిక సహాయం జమ చేస్తున్నామని తెలిపారు.
ఈ కార్యక్రమంలో జిల్లా గృహ నిర్మాణ సంస్థ ఇన్‌చార్జి ప్రాజెక్టు డైరెక్టర్‌, జిల్లా రెవెన్యూ అధికారిణి గీత, మండల ప్రత్యేక అధికారి (డీఆర్డీఓ) సాయన్న, బోధన్ ఆర్డీఓ విజయకుమారి, స్థానిక సర్పంచ్‌ సాయిలు, మండల సర్పంచుల ఫోరం అధ్యక్షుడు రాజాగౌడ్‌, హౌసింగ్‌ డీఈ గంగాధర్‌, ఎంపీడీఓ శంకర్‌నాయక్‌, తహసీల్దార్‌ దత్తాద్రి, స్థానిక నాయకులు పులి శ్రీనివాస్‌, బి.రాంమోహన్‌ తదితరులు పాల్గొన్నారు.
