కలం, స్పోర్ట్స్: ఫిఫా వరల్డ్ కప్ నాకౌట్ పోరుకు బ్రెజిల్ స్టార్ ప్లేయర్ నేమార్ (Neymar) జూనియర్ పూర్తి ఫిట్నెస్తో సిద్ధమయ్యాడు. ఆదివారం నార్వేతో జరగబోయే కీలకమైన రౌండ్ ఆఫ్ 16 మ్యాచ్లో అతను పూర్తి 90 నిమిషాల పాటు ఆడేందుకు సిద్ధంగా ఉన్నాడని బ్రెజిల్ కోచ్ కార్లో అన్సెలొట్టి తాజాగా స్పష్టం చేశారు. గతంలో ఖతార్ వరల్డ్ కప్ క్వార్టర్ ఫైనల్లో బ్రెజిల్ పెనాల్టీల్లో ఓడిపోయింది. ఆ తర్వాత దాదాపు మూడేళ్లపాటు జాతీయ జట్టుకు దూరంగా ఉన్న 34 ఏళ్ల నేమార్, ఈ టోర్నీలో స్కాట్లాండ్పై జరిగిన గ్రూప్ మ్యాచ్ ద్వారా పునరాగమనం చేశాడు.
ఆ మ్యాచ్లో బ్రెజిల్ గెలిచి నాకౌట్కు చేరింది. అయితే ఆ తర్వాతి మ్యాచ్లో జపాన్పై బ్రెజిల్ 2-1తో విజయం సాధించినప్పటికీ, నేమార్కు ఆడే అవకాశం రాలేదు. ప్రస్తుతం మంచి ఫామ్లో ఉన్న నార్వేతో తలపడబోయే ముందు కోచ్ అన్సెలొట్టి మాట్లాడుతూ.. నేమార్ (Neymar) పూర్తిగా కోలుకున్నాడని, జట్టుకు అవసరమైనప్పుడు అతడిని మైదానంలోకి దించుతానని చెప్పారు. నేమార్ బెంచ్కే పరిమితం కావడంపై అసంతృప్తిగా ఉన్నా, జట్టు పట్ల ఎంతో వినయంగా, గౌరవంగా ఉంటున్నాడని కొనియాడారు.
మరోవైపు బ్రెజిల్ మాజీ స్ట్రైకర్ కారేకా సైతం నేమార్ ఫిట్నెస్పై స్పందించారు. 24 ఏళ్ల వరల్డ్ కప్ నిరీక్షణకు తెరదించాలంటే నేమార్ పూర్తి ఫిట్నెస్తో ఉండటం జట్టుకు ఎంతో అవసరమని ఆయన ఆశాభావం వ్యక్తం చేశారు.
