కలం, వెబ్ డెస్క్: క్వీన్స్ క్లబ్ ఛాంపియన్షిప్స్లో బ్రిటన్కు చెందిన వైల్డ్కార్డ్ ప్లేయర్ కేటీ బౌల్టర్ (Katie Boulter) భారీ సంచలనం సృష్టించింది. టోర్నీ టాప్ సీడ్ ఎలెనా రైబాకినా (Elena Rybakina)ను 7-5, 2-6, 7-5తో ఓడించి సెమీఫైనల్లోకి అడుగుపెట్టింది. ఈ విజయంతో రైబాకినాపై బౌల్టర్ తొలి గెలుపును నమోదు చేసింది. గతంలో 2023 వింబుల్డన్, 2025 ఇండియన్ వెల్స్ టోర్నీల్లో రైబాకినా చేతిలో బౌల్టర్ ఓడిపోయింది. ఆ ఓటమి తనను చాలా కాలం వెంటాడిందని, ఈసారి మరింత ధైర్యంగా ఆడాలని నిర్ణయించుకున్నట్లు మ్యాచ్ అనంతరం తెలిపింది.
వర్షం కారణంగా గురువారం మ్యాచ్లు వాయిదా పడటంతో బౌల్టర్కు శుక్రవారం కఠిన పరీక్ష ఎదురైంది. ఉదయం రెండో రౌండ్లో జాక్వెలిన్ క్రిస్టియన్ను 6-3, 6-1తో ఓడించిన ఆమె, తర్వాత క్వార్టర్ఫైనల్లో ప్రపంచ నంబర్-2 రైబాకినాపై విజయం సాధించింది. ఇప్పుడు సెమీఫైనల్లో బౌల్టర్ క్రొయేషియాకు చెందిన డోనా వెకిచ్ను ఎదుర్కొననుంది. వెకిచ్ కూడా శుక్రవారం రెండు మ్యాచ్లు ఆడి, క్వార్టర్ఫైనల్లో మాజీ ప్రపంచ నంబర్-1 కరోలినా ప్లిస్కోవాను 6-4, 4-6, 6-3తో ఓడించింది.
మరోవైపు అమెరికా యువ ఆటగాళి ఇవా జోవిచ్ కూడా సెమీఫైనల్ చేరింది. ఆమె అమాండా అనిసిమోవాపై మూడు సెట్ల పోరులో విజయం సాధించింది. జోవిచ్ తదుపరి మ్యాచ్లో ఎమ్మా రాడుకాను లేదా కమిల్లా రఖిమోవాలో ఒకరిని ఎదుర్కొనుంది.
