కలం, కరీంనగర్ బ్యూరో: ఆదివారం జరగనున్న నీట్ (NEET) ప్రవేశ పరీక్షను పురస్కరించుకుని, జిల్లాలో పరీక్షలు ప్రశాంతంగా, పారదర్శకంగా జరిగేలా పటిష్ట భద్రతా చర్యలు చేపట్టినట్లు కరీంనగర్ పోలీస్ కమిషనర్ గౌష్ ఆలం (Karimnagar CP) తెలిపారు. శనివారం అస్త్ర కన్వెన్షన్ హాల్లో పరీక్షల భద్రతా ఏర్పాట్లపై ఆయన పోలీస్ అధికారులతో సుదీర్ఘ సమీక్షా సమావేశం నిర్వహించి, పలు కీలక ఆదేశాలు జారీ చేశారు. ఈ సందర్భంగా పోలీస్ కమిషనర్ మాట్లాడుతూ, కరీంనగర్ పరిధిలో మొత్తం 7 పరీక్షా కేంద్రాలను ఏర్పాటు చేశామని, దాదాపు 3000 మంది విద్యార్థులు ఈ పరీక్షకు హాజరుకానున్నారని తెలిపారు. పరీక్షా కేంద్రాల వద్ద ఎలాంటి అవాంఛనీయ సంఘటనలు జరగకుండా భారీ పోలీసు బందోబస్తు ఏర్పాటు చేయాలని అధికారులను ఆదేశించారు.
సీపీ జారీ చేసిన ముఖ్య ఆదేశాలు:
144 సెక్షన్ అమలు: పరీక్షా కేంద్రాల పరిసర ప్రాంతాల్లో 144 సెక్షన్ అమలులో ఉంటుందని, ఐదుగురు అంతకంటే ఎక్కువ మంది గుంపులుగా చేరడం నిషిద్ధమని స్పష్టం చేశారు.
జిరాక్స్ సెంటర్ల మూసివేత: పరీక్ష జరుగుతున్న సమయంలో కేంద్రాల సమీపంలోని జిరాక్స్ సెంటర్లు, ఇంటర్నెట్ కేఫ్లను తప్పనిసరిగా మూసివేయించాలి.
రెండంచెల తనిఖీ: విద్యాశాఖ అధికారులతో సమన్వయం చేసుకుంటూ, నేషనల్ టెస్టింగ్ ఏజెన్సీ (NTA) నిబంధనల ప్రకారం అభ్యర్థులను రెండంచెల క్షుణ్ణంగా తనిఖీ చేసిన తర్వాతే లోపలికి అనుమతించాలి.
ట్రాఫిక్ నియంత్రణ: విద్యార్థులు సకాలంలో పరీక్షా కేంద్రాలకు చేరుకునేలా ట్రాఫిక్ పోలీసులు ప్రత్యేక చర్యలు చేపట్టాలని, కేంద్రాల వద్ద వాహనాల రద్దీ లేకుండా చూడాలని ఆదేశించారు.
పోలీస్ కమిషనర్ హెచ్చరిక:
“విద్యార్థుల భవిష్యత్తుకు కీలకమైన నీట్ పరీక్షను ఎలాంటి అవకతవకలు లేకుండా ప్రశాంతంగా నిర్వహించడమే మన బాధ్యత. ఎవరైనా అల్లరి మూకలు పరీక్షకు ఆటంకం కలిగించినా లేదా అక్రమాలకు పాల్పడినా చట్టప్రకారం అత్యంత కఠిన చర్యలు తీసుకుంటాం.”
ఈ సమీక్షా సమావేశంలో జిల్లాలోని ఏసీపీలు విజయకుమార్, యాదగిరిస్వామి, సతీష్, వెంకటస్వామి లతోపాటు సీఐలు, ఎస్ఐలు, ఇతర పోలీస్ సిబ్బంది పాల్గొన్నారు.
