కలం, స్పోర్ట్స్ : వింబుల్డన్లో మరోసారి జానిక్ సిన్నర్ (Jannik Sinner) తన సత్తా చాటాడు. జర్మనీకి చెందిన అలెగ్జాండర్ జ్వెరెవ్ను ఫైనల్లో ఓడించి వరుసగా రెండో వింబుల్డన్ టైటిల్ గెలిచాడు. ఈ విజయంతో సిన్నర్ ఆటపై మరోసారి చర్చ మొదలైంది. ప్రస్తుతం పురుషుల టెన్నిస్లో జానిక్ సిన్నర్, కార్లోస్ అల్కరాజ్ ఆధిపత్యం కొనసాగుతోంది. నొవాక్ జొకోవిచ్ ఇప్పటికీ గట్టి పోటీ ఇస్తున్నా, ఈ తరం టెన్నిస్కు సిన్నర్, అల్కరాజ్ కొత్త ముఖాలుగా నిలిచారు. అల్కరాజ్ గాయంతో దూరమైన వేళ సిన్నర్ మరోసారి తన స్థాయిని నిరూపించాడు.
ఫైనల్లో జ్వెరెవ్పై పూర్తి ఆధిపత్యం చూపించాడు. సిన్నర్ ఆటలో ప్రత్యేకత అతని బేస్లైన్ గేమ్. బంతి ఎత్తుకు వచ్చిన వెంటనే దాన్ని కొడతాడు. దీంతో ప్రత్యర్థికి సమయం దొరకదు. ప్రతి షాట్ వేగంగా తిరిగి వస్తుంది. దీంతో ఎదురుగా ఉన్న ఆటగాడు ఒత్తిడిలో పడిపోతాడు. చాలా మంది స్టార్ ఆటగాళ్లకు ఒక వైపు బలం, మరో వైపు బలహీనత ఉంటుంది. కానీ సిన్నర్ విషయంలో అది కనిపించదు. అతని ఫోర్హ్యాండ్, బ్యాక్హ్యాండ్ రెండూ ఒకే స్థాయిలో ప్రమాదకరంగా ఉంటాయి.
రెండు వైపులా ఒకే వేగంతో బంతిని కొట్టగలడు. అందుకే ప్రత్యర్థులు అతని బలహీనతను గుర్తించడం కష్టమవుతుంది. సిన్నర్ విజయానికి మరో కారణం అతని మానసిక ధైర్యం. మ్యాచ్లో ఒత్తిడి పెరిగినా ఆందోళన చెందడు. కోపం చూపించడు. తన వ్యూహాన్ని మార్చకుండా అదే ప్రణాళికతో ఆడతాడు. కార్లోస్ అల్కరాజ్ వేగం, జొకోవిచ్ ఫిట్నెస్తో మ్యాచ్లను గెలుస్తుంటే, సిన్నర్ మాత్రం కచ్చితమైన షాట్లు, ప్రశాంతమైన ఆలోచన, స్థిరమైన ఆటతో ప్రత్యర్థిని నెమ్మదిగా ఒత్తిడిలోకి నెడతాడు. ఇదే అతడిని ప్రపంచ నంబర్-1గా నిలబెట్టిన ప్రధాన బలంగా టెన్నిస్ విశ్లేషకులు భావిస్తున్నారు.
