కలం, స్పోర్ట్స్ : మలేషియా లేడీస్ అమెచ్యూర్ ఓపెన్ గోల్ఫ్ టోర్నీలో (Malaysian Ladies Amateur Open) భారత యువ గోల్ఫర్లు సత్తా చాటుతున్నారు. రెండో రౌండ్ ముగిసే సమయానికి భారత ప్లేయర్లు సీరత్ కాంగ్, గుంతాస్ కౌర్ సంధు టాప్-10లో చోటు దక్కించుకున్నారు. టీమ్ విభాగంలో భారత జట్టు మూడో స్థానంలో కొనసాగుతోంది. సెలంగోర్లోని గ్లెన్మేరీ గోల్ఫ్ అండ్ కంట్రీ క్లబ్లో జరుగుతున్న ఈ టోర్నీలో ఇండియన్ గోల్ఫ్ యూనియన్ తరఫున సీరత్ కాంగ్, గుంతాస్ కౌర్ సంధు బరిలోకి దిగారు. రెండో రోజు ముగిసే సమయానికి భారత జట్టు ఫోర్-ఓవర్ 292 స్కోరు సాధించింది. అగ్రస్థానంలో ఉన్న మలేషియా జట్టు కంటే భారత్ కేవలం నాలుగు స్ట్రోక్ల వెనుకంజలో ఉంది.
చండీగఢ్కు చెందిన 15 ఏళ్ల గుంతాస్ కౌర్ సంధు రెండో రౌండ్లో టూ-ఓవర్ 74 స్కోరు నమోదు చేశారు. దీంతో ఆమె ఓవరాల్గా ఏడో స్థానంలో నిలిచారు. తొలి భాగంలో మూడు బర్డీలు, రెండు బోగీలు చేసిన గుంతాస్.. చివరి భాగంలో ఒక బర్డీ, రెండు బోగీలు సాధించారు.
పంచకులకు చెందిన 19 ఏళ్ల సీరత్ కాంగ్ కూడా అద్భుత ప్రదర్శన చేశారు. రెండో రౌండ్లో తొలి భాగంలో వరుసగా మూడు బర్డీలతో ఆకట్టుకున్న ఆమె.. 16వ, 18వ రంధ్రాల వద్ద బోగీలు ఎదుర్కొన్నారు. అయినప్పటికీ వన్-అండర్ 71 స్కోరు సాధించారు. మొత్తంగా వన్-ఓవర్ 145 స్కోరుతో ఆరో స్థానంలో కొనసాగుతున్నారు. ఇక స్థానిక గోల్ఫర్ అంబర్లీ జైరా బింతి జామ్రా రెండో రౌండ్లో ఫైవ్-అండర్ 67 స్కోరుతో మెరిశారు. ఓవరాల్గా టూ-అండర్ 142 స్కోరుతో ఆమె అగ్రస్థానంలో నిలిచారు. మలేషియా లేడీస్ అమెచ్యూర్ ఓపెన్లో భారత ప్లేయర్ల ప్రదర్శనపై అభిమానుల్లో ఆసక్తి నెలకొంది. టీమ్ విభాగంలో భారత్ మెరుగైన స్థానం కోసం పోరాడుతోంది.
