కలం, వెబ్ డెస్క్: బ్యాంక్ ఉద్యోగాల (Bank Jobs) కోసం ప్రిపేర్ అవుతున్నవారికి ఐబీపీఎస్ శుభవార్త చెప్పింది. పంజాబ్ నేషనల్ బ్యాంక్ సహా 11 బ్యాంకుల్లో 745 స్పెషలిస్ట్ ఆఫీసర్ల పోస్టుల భర్తీకి నోటిఫికేషన్ విడుదల చేసింది. ఈ నెల 21వ తేదీ వరకు దరఖాస్తు చేసుకునే అవకాశం కల్పించింది. ఈసారి నోటిఫికేషన్లో మరో మూడు రకాల స్పెషలైజేషన్ జాబ్స్ కూడా యాడ్ చేసింది.
ప్రభుత్వ రంగ బ్యాంకుల్లో కొలువు అంటే భద్రతతో పాటు విధిగా ప్రమోషన్లు, సకల సౌకర్యాలు కూడా ఉంటాయి. సీరియస్ అభ్యర్థులకు ఇదొక మంచి అవకాశమని బ్యాంకింగ్ పరీక్షల నిపుణులు చెబుతున్నారు.
పోస్టుల వివరాలు ఇలా..
అగ్రికల్చర్ ఫీల్డ్ ఆఫీసర్: ఈ విభాగంలో 190 పోస్టులున్నాయి. వ్యవసాయ డిగ్రీ కచ్చితంగా చదివి ఉండాలి. అప్పుడే దరఖాస్తులను పరిగణనలోకి తీసుకుంటారు. అగ్రికల్చర్ అంటే హార్టికల్చర్, యానిమల్ హస్బెండరీ, డెయిరీ సైన్స్, ఫిషింగ్ సైన్స్, కో–ఆపరేటివ్ మార్కెటింగ్ వంటివి కూడా వస్తాయి. నోటిఫికేషన్ జాగ్రత్తగా పరిశీలించి అప్లై చేసుకోవచ్చు.
హెచ్ఆర్ పర్సనల్ ఆఫీసర్: దీనిలో 60 పోస్టులున్నాయి. హెచ్ఆర్, పర్సనల్ మేనేజ్మెంట్ విభాగంలో పీజీ డిప్లొమా చేసి ఉండాలి. సోషల్ వర్క్, లేబర్ లా కోర్సులు చేసినవారు కూడా దరఖాస్తు చేసుకోవచ్చు.
ఐటీ ఆఫీసర్: ఈ విభాగంలో 301 పోస్టులున్నాయి. బీఈ, బీటెక్ చేసినవారు అర్హులు. కంప్యూటర్ సైన్స్, కంప్యూటర్ అప్లికేషన్స్, ఇన్ఫర్మేషన్ టెక్నాలజీ, ఎలక్ట్రానిక్స్ కమ్యూనికేషన్, ఎలక్ట్రానిక్స్ ఇన్స్ట్రుమెంటేషన్ కోర్సులు చేసి ఉండాలి.
లా ఆఫీసర్: దీనిలో 105 పోస్టులున్నాయి. ఎల్ఎల్బీ చేసి ఉండాలి. పర్సనల్ మేనేజ్మెంట్, ఇండస్ట్రియల్ రిలేషన్స్ లో పీజీ డిప్లొమా ఉన్నవారికి మరింత ప్రాధాన్యం ఉంటుంది.
రాజభాష అధికారి: 89 పోస్టులు భర్తీ చేయబోతున్నారు. భాష ప్రావీణ్యం ఉన్నవారిని తీసుకుంటారు. దీనికి కూడా ఐబీపీఎస్ నిర్దేశిత డిగ్రీ అవసరం.
మూడు అంచెల్లో పరీక్ష..
ఆన్ లైన్ విధానంలోనే పరీక్షలు జరుగుతాయి. తొలుత ప్రిలిమ్స్ నిర్వహిస్తారు. ఇందులో పాసైన వారిని మెయిన్స్ పరీక్షలకు అనుమతిస్తారు. ఇక్కడ ప్రతిభ చూపినవారిని ఇంటర్వ్యూకు ఎంపిక చేస్తారు. అనంతరమే నిర్దేశించిన ఉద్యోగాల్లోకి తీసుకుంటారు. ఐబీపీఎస్ నిబంధనలకు లోబడి నియామక ప్రక్రియ ఉంటుంది.
Read Also: కాంట్రాక్ట్ ఉద్యోగుల జీతాలపై సీఎం రేవంత్ మార్క్ నిర్ణయం
Follow Us On: Instagram
