కలం, స్పోర్ట్స్ : లక్నో సూపర్ జాయింట్స్తో జరిగిన పోరు (GT vs LSG)లో గుజరాత్ టైటాన్స్ సర్వశక్తులూ ఒడ్డి అద్భుత విజయాన్ని అందుకుంది. 165 పరుగుల లక్ష్యాన్ని గుజరాత్ కేవలం 18.4 ఓవర్లలోనే 3 వికెట్లు కోల్పోయి ఛేదించింది. కెప్టెన్ శుభ్మన్ గిల్, స్టార్ బ్యాటర్ జోస్ బట్లర్ అమోఘమైన బ్యాటింగ్తో లక్నో బౌలర్లను ముప్పుతిప్పలు పెట్టారు. ఛేదనలో గుజరాత్కు ఆదిలోనే సాయి సుదర్శన్ (15) వికెట్ కోల్పోయి షాక్ తగిలినప్పటికీ, ఆ తర్వాత శుభ్మన్ గిల్ (56 పరుగులు, 40 బంతుల్లో, 6 ఫోర్లు, 1 సిక్స్), జోస్ బట్లర్ (60 పరుగులు, 37 బంతుల్లో, 11 ఫోర్లు) కలిసి ఇన్నింగ్స్ను నిలబెట్టారు. ముఖ్యంగా బట్లర్ తన ట్రేడ్మార్క్ షాట్లతో బౌండరీల వర్షం కురిపించగా, గిల్ బాధ్యతాయుతమైన ఇన్నింగ్స్తో ఆకట్టుకున్నాడు. వీరిద్దరూ రెండో వికెట్కు భారీ భాగస్వామ్యాన్ని నెలకొల్పి విజయాన్ని ఖాయం చేశారు. చివర్లో వాషింగ్టన్ సుందర్ (21*), రాహుల్ తెవాటియా (10*) ఫినిషింగ్ టచ్ ఇచ్చారు.
అంతకుముందు టాస్ గెలిచి బ్యాటింగ్ ఎంచుకున్న లక్నో సూపర్ జాయింట్స్ నిర్ణీత 20 ఓవర్లలో 8 వికెట్ల నష్టానికి 164 పరుగులు చేసింది. గుజరాత్ పేసర్ ప్రసిద్ధ్ కృష్ణ నిప్పులు చెరిగే బంతులతో లక్నో టాప్ ఆర్డర్ను దెబ్బతీశాడు. 4 ఓవర్లలో కేవలం 28 పరుగులిచ్చి 4 కీలక వికెట్లు పడగొట్టి లక్నోను కోలుకోనీయకుండా చేశాడు. లక్నో బ్యాటర్లలో ఎయిడెన్ మార్క్రామ్ (30) టాప్ స్కోరర్గా నిలవగా, నికోలస్ పూరన్ (19), రిషబ్ పంత్ (18) ఆశించిన స్థాయిలో రాణించలేకపోయారు. అశోక్ శర్మ రెండు వికెట్లు తీసి ప్రసిద్ధ్కు చక్కని సహకారం అందించాడు. సమష్టి కృషితో ఆకట్టుకున్న గుజరాత్ టైటాన్స్ అన్ని విభాగాల్లోనూ లక్నో (GT vs LSG) కంటే మెరుగైన ప్రదర్శన కనబరిచి పాయింట్ల పట్టికలో తమ స్థానాన్ని మెరుగుపరుచుకుంది. లక్నో బౌలర్లలో షమీ, ప్రిన్స్ యాదవ్, దిగ్వేష్ తలో వికెట్ తీసినప్పటికీ గుజరాత్ జోరును అడ్డుకోలేకపోయారు.
Read Also: నో కాంప్రమైజ్.. ఇదే జెన్ జీ ఫార్ములా!!
Follow Us On : WhatsApp
