కలం, స్పోర్ట్స్ : చెస్ ఒలింపియాడ్లో(Chess Olympiad 2026) భారత పురుషుల జట్టు సత్తా చాటింది. సమర్కండ్ వేదికగా జరుగుతున్న 46వ చెస్ ఒలింపియాడ్లో 10వ రౌండ్లో ఉజ్బెకిస్థాన్-2 (Uzbekistan-2) జట్టుపై భారత్ 3.5-0.5 తేడాతో ఘనవిజయం సాధించింది. అంతకుముందు జర్మనీపై విజయం సాధించిన భారత జట్టు.. తాజా గెలుపుతో పాయింట్ల పట్టికలో రెండో స్థానాన్ని మరింత పటిష్టం చేసుకుంది. ఉజ్బెకిస్థాన్-2తో జరిగిన పోరులో భారత యువ గ్రాండ్మాస్టర్లు ప్రజ్ఞానంద, నిహాల్ సరిన్, గుకేష్ తమ ప్రత్యర్థులపై అద్భుత విజయాలు నమోదు చేశారు. ఉజ్బెకిస్థాన్ ఆటగాళ్ల నుంచి గట్టి పోటీ ఎదురైనప్పటికీ భారత ఆటగాళ్లు సమయస్ఫూర్తితో వ్యవహరిస్తూ కీలక విజయాలను అందుకున్నారు. మరో బోర్డులో అర్జున్ ఎరిగాయిసి ప్రత్యర్థిని సమర్థంగా ఎదుర్కొని తన గేమ్ను డ్రాగా ముగించాడు.
మరోవైపు మహిళల విభాగంలో చైనాతో జరిగిన పోరును భారత జట్టు 2-2తో డ్రా చేసుకుంది. కోనేరు హంపి, దివ్య దేశ్ముఖ్ తమ గేమ్లను డ్రాగా ముగించగా.. వంతిక అగర్వాల్ ఓటమి చవిచూశారు. అయితే చివర్లో సవితా శ్రీ కీలక విజయం సాధించడంతో భారత్ ఓటమి నుంచి తప్పించుకుని మ్యాచ్ను డ్రాగా ముగించింది. చెస్ ఒలింపియాడ్లో రెండు విభాగాల్లోనూ భారత క్రీడాకారులు ఆకట్టుకునే ప్రదర్శన కొనసాగిస్తున్నారు. టోర్నీ తుది దశకు చేరుకుంటున్న నేపథ్యంలో తదుపరి రౌండ్లలోనూ మెరుగైన ప్రదర్శనతో పతకాలు సాధించడమే లక్ష్యంగా భారత జట్లు బరిలోకి దిగనున్నాయి.
