కలం, వెబ్ డెస్క్ : హిమాచల్ ప్రదేశ్‌లోని చంబా (Chamba Earthquake) జిల్లాలో ఉదయం వేళ స్వల్ప భూకంపం సంభవించింది. నేషనల్ సెంటర్ ఫర్ సీస్మోలజీ (NCS) అందించిన వివరాల ప్రకారం.. రిక్టర్ స్కేలుపై ఈ భూకంప తీవ్రత 3.2గా నమోదైంది. ఈ ప్రకంపనలు ఉదయం సరిగ్గా 6:59 గంటల సమయంలో చోటుచేసుకున్నాయి. దీని కేంద్రబిందువు చంబా సమీపంలో భూ ఉపరితలానికి 15 కిలోమీటర్ల లోతులో ఉన్నట్లు అధికారులు ధ్రువీకరించారు.ఉదయాన్నే నిద్రలేచే సమయంలో భూమి కంపించడంతో స్థానిక ప్రజలు ఒక్కసారిగా భయాందోళనకు గురై ఇళ్ల నుంచి బయటకు పరుగులు తీశారు.
అయితే, ఈ ఘటన వల్ల ఎలాంటి ఆస్తి నష్టం గానీ, ప్రాణ నష్టం గానీ జరగలేదని అధికారులు తెలిపారు. ఇరుగుపొరుగున ఉన్న కాంగ్రా జిల్లా ప్రాంతాల్లో కూడా ప్రకంపనలు కనిపించినట్లు స్థానికులు పేర్కొన్నారు. హిమాచల్ ప్రదేశ్ ప్రాంతం భౌగోళికంగా భూకంప తీవ్రత ఎక్కువగా ఉండే ‘సీస్మిక్ జోన్ IV, V’ పరిధిలోకి వస్తుంది. హిమాలయ శ్రేణుల్లో భూగర్భ ఫలకాల కదలికల వల్ల ఈ ప్రాంతంలో తరచుగా స్వల్ప భూకంపాలు సంభవిస్తుంటాయని భూవిజ్ఞాన శాస్త్రవేత్తలు అంటున్నారు. పరిస్థితి ప్రస్తుతం పూర్తిగా అదుపులోనే ఉందని, ప్రజలు ఆందోళన చెందాల్సిన అవసరం లేదని యంత్రాంగం స్పష్టం చేసింది.
