కలం, స్పోర్ట్స్ : నాలుగేళ్ల తర్వాత టీమిండియాలోకి భువనేశ్వర్ కుమార్ (Bhuvneshwar kumar) రీఎంట్రీ ఇచ్చాడు. న్యూజిలాండ్‌తో ఐదు టీ20ల సిరీస్‌కు 16 మంది సభ్యుల జట్టులో చోటు దక్కించుకున్నాడు. ఈ ఎంపికపై రవిచంద్రన్ అశ్విన్ స్పందించాడు. భువీకి తలుపు తెరిచినట్లే.. మహ్మద్ షమీకి కూడా అవకాశాలు ఇంకా ఉన్నాయని అభిప్రాయపడ్డాడు. భువనేశ్వర్ చివరిసారిగా 2022 నవంబర్‌లో భారత్ తరఫున టీ20 ఆడాడు. దాదాపు నాలుగేళ్ల తర్వాత మళ్లీ జాతీయ జట్టులోకి వచ్చాడు. 2026 ఐపీఎల్‌లో రాయల్ ఛాలెంజర్స్ బెంగళూరు తరఫున 28 వికెట్లు పడగొట్టడం అతడి ఎంపికకు ప్రధాన బలంగా నిలిచింది.
జస్‌ప్రీత్ బుమ్రాకు ఈ టీ20 సిరీస్‌లో విశ్రాంతి ఇచ్చారు. దీంతో బౌలింగ్‌లో అనుభవం కోసం భువీని తీసుకున్నట్లు తెలుస్తోంది. అతడి స్వింగ్ బౌలింగ్, పవర్‌ప్లే అనుభవం జట్టుకు ఉపయోగపడనుంది. భువీ ఎంపికపై అశ్విన్ తన షోలో స్పందించాడు. సెలక్షన్‌లో ఇప్పుడు అనుభవానికి కూడా ప్రాధాన్యం కనిపిస్తోందని చెప్పాడు. బుమ్రా లేని సమయంలో భారత బౌలింగ్‌లో కొంత అనుభవం అవసరమని పేర్కొన్నాడు. భువనేశ్వర్‌కు చోటు దక్కడంతో షమీకి కూడా జాతీయ జట్టు తలుపులు మూసుకుపోలేదని అశ్విన్ అభిప్రాయపడ్డాడు.
భువీ (Bhuvneshwar kumar) తన ప్రదర్శనతో తిరిగి చోటు సంపాదించుకున్నాడని చెప్పాడు. షమీ చివరిసారిగా 2025 మార్చిలో న్యూజిలాండ్‌తో జరిగిన ఛాంపియన్స్ ట్రోఫీ ఫైనల్లో భారత్ తరఫున ఆడాడు. ఆ తర్వాత గాయంతో జట్టుకు దూరమయ్యాడు. దేశవాళీ క్రికెట్, ఐపీఎల్‌లో ఆడినా తిరిగి జాతీయ జట్టులోకి రాలేకపోయాడు. భువనేశ్వర్ భారత్ తరఫున 87 టీ20లు ఆడి 90 వికెట్లు తీశాడు. 6.96 ఎకానమీతో బౌలింగ్ చేశాడు. ఇప్పుడు న్యూజిలాండ్‌తో సిరీస్‌లో తన పునరాగమనాన్ని మొదలు పెట్టనున్నాడు.
