కలం, స్పోర్ట్స్: టెన్నిస్ ప్రపంచంలో ఒక ఊహించని నిర్ణయం తీవ్ర చర్చనీయాంశంగా మారింది. వింబుల్డన్ మాజీ ఛాంపియన్ మార్కెటా వోండ్రూసోవాపై ఇంటర్నేషనల్ టెన్నిస్ ఇంటిగ్రిటీ ఏజెన్సీ (ITIA) నాలుగేళ్ల పాటు భారీ నిషేధం విధించింది. జూన్ 22, సోమవారం నాడు వెలువడిన ఈ నిర్ణయంపై టెన్నిస్ దిగ్గజం, మాజీ వరల్డ్ నంబర్ వన్ ఆండీ రాడిక్ (Andy Roddick) ఒక పాడ్కాస్ట్లో ఆసక్తికర వ్యాఖ్యలు చేశారు. గత ఏడాది చివర్లో రాత్రి 8 గంటల తర్వాత డోపింగ్ పరీక్ష అధికారులు హఠాత్తుగా మార్కెటా ఇంటికి వచ్చారు. అంత రాత్రి వేళ అపరిచిత వ్యక్తులు రావడంతో ఆమె శాంపిల్స్ ఇవ్వడానికి నిరాకరించింది.
దీనిపై విచారణ జరిపిన అధికారులు ఆమెపై ఈ నిషేధాన్ని విధించారు. ఈ విషయంపై రాడిక్ (Andy Roddick) మాట్లాడుతూ.. మార్కెటా పరిస్థితిని తాను అర్థం చేసుకోగలనని చెప్పారు. ఒకవేళ తన 26 ఏళ్ల కూతురి ఇంటికి కూడా రాత్రి పూట ఎవరైనా తెలియని వ్యక్తులు వస్తే, తలుపు తీయవద్దనే తాను సలహా ఇస్తానని అన్నారు. అయితే, ఇలాంటి కారణాలతో పరీక్షలకు నిరాకరిస్తే అది నిషేధిత మందులు వాడే వారికి ఒక లూప్హోల్లా మారుతుందని రాడిక్ అభిప్రాయపడ్డారు. ప్రతి ఒక్కరూ ఇదే కారణం చెబితే అసలు డోపింగ్ పరీక్షలు నిర్వహించడం ఎలా సాధ్యమవుతుందని ప్రశ్నించారు. చివరగా, మార్కెటాకు విధించిన శిక్షా కాలాన్ని రాడిక్ తప్పుబట్టారు. టెన్నిస్లో ఇంత సుదీర్ఘ కాలం నిషేధం విధించడం తాను చూడలేదని, ఈ నాలుగేళ్ల శిక్ష చాలా ఎక్కువని అసంతృప్తి వ్యక్తం చేశారు.
