కలం, వెబ్ డెస్క్ : తమ ఇల్లు ప్యాలెస్లా ఉండాలని ఎవరికి ఆశ ఉండదు. కానీ, హోమ్ డెకరేషన్ అంటేనే లక్షల రూపాయల ఖర్చు అని భయపడి వెనకడుగు వేస్తుంటారు. నిజానికి, ఇంటిని అందంగా తీర్చిదిద్దడానికి ఖరీదైన వస్తువుల కంటే కూడా తెలివైన ఆలోచనలు ముఖ్యమని యూరో ప్రతీక్ ఎండీ ప్రతీక్ సింఘ్వీ చెబుతున్నారు. అంతేకాదు ఇంటిని అందంగా మార్చడానికి ఆయన కొన్ని సింపుల్ టిప్స్ (Home Decoration Tips) కూడా చెప్పారు. ఆ టిప్స్ పాటిస్తే బడ్జెట్లోనే ఇల్లు అదిరిపోయే లుక్ను పొందుతుంది.
ఒకే రకమైన థీమ్ను పాటించండి
ఇల్లు మొత్తం చూడముచ్చటగా, ఒక పద్ధతిలో కనిపించాలంటే గోడలకు మరియు ఫర్నిచర్కు ఒకే రకమైన డిజైన్ లాంగ్వేజ్ ఉండాలని ప్రతీక్ సింఘ్వీ సూచించారు. రెడీ-టు-ఇన్స్టాల్ ప్యానెల్స్, లామినేట్స్, ఇంటీరియర్ ఫిల్మ్స్ వాడటం వల్ల ఇంటికి ఒక ‘కోహెసివ్ లుక్’ వస్తుంది. ఇలా చేయడం వల్ల ఇల్లు గందరగోళంగా లేకుండా చాలా ఆర్గనైజ్డ్గా కనిపిస్తుంది.
రెడీమేడ్ ప్యానెల్స్తో శ్రమ తగ్గించుకోండి
పాత కాలంలో లాగా ఇంటి డెకరేషన్ కోసం ఇప్పుడు రోజుల తరబడి వడ్రంగులతో పని చేయించాల్సిన అవసరం లేదు. ఫ్యాక్టరీలోనే తయారయ్యే ఫినిష్డ్ ప్యానెల్స్ వాడటం వల్ల సమయం ఆదా అవ్వడమే కాకుండా, ఫినిషింగ్ కూడా ఎంతో నీట్గా వస్తుందని ఆయన పేర్కొన్నారు. తక్కువ బడ్జెట్, తక్కువ స్థలం ఉన్న పట్టణ వాసులకు ఇవి ఎంతో మేలు చేస్తాయి.
ఇంటికి కొత్త రూపునిచ్చే లూవర్డ్ ప్యానెల్స్
ఇంటికి కొంచెం లోతు, కొత్త రకమైన స్టైల్ కావాలనుకుంటే ‘ఫ్లూటెడ్’ లేదా ‘లూవర్డ్’ ప్యానెల్స్ వాడటం ఉత్తమమని ఆయన సలహా ఇచ్చారు. ఇవి ఇంటికి బరువును పెంచవు కానీ, చూసేవారికి మాత్రం ఇల్లు చాలా మోడ్రన్గా, ఖరీదైనదిగా అనిపించేలా చేస్తాయి. ఇంటి లుక్ని ఇన్ స్టంట్గా మార్చడానికి ఇవి బాగా ఉపయోగపడతాయి.
మన్నికైన వస్తువులకే ప్రాధాన్యం ఇవ్వండి
ఇంటి డెకరేషన్లో కేవలం అందం మాత్రమే కాదు, మన్నిక కూడా ముఖ్యమని ప్రతీక్ సింఘ్వీ అభిప్రాయపడ్డారు. రోజూ వాడే వస్తువులు కాబట్టి త్వరగా పాడవని, సులభంగా క్లీన్ చేసుకోగలిగే లామినేట్స్ మరియు మెటీరియల్స్ ఎంచుకోవాలి. నాణ్యమైన అడెసివ్స్ (జిగురు) వాడటం వల్ల ఫర్నీచర్ ఎక్కువ కాలం కొత్తదనాన్ని కోల్పోకుండా ఉంటుంది.
ఎకో ఫ్రెండ్లీ మెటీరియల్స్ వాడండి
ప్రస్తుతం చాలామంది పర్యావరణానికి మేలు చేసే ఎకో-ఫ్రెండ్లీ వస్తువుల వైపు మొగ్గు చూపుతున్నారని ఆయన వివరించారు. ఇవి ఖర్చును తగ్గించడమే కాకుండా, వేస్టేజీని కూడా అరికడతాయి. నాణ్యతలో రాజీ పడకుండానే తక్కువ ధరలో ఇంటికి మంచి ఫినిషింగ్ ఇవ్వడానికి ఇవి చక్కటి మార్గం.
