కలం డెస్క్ : కేంద్ర ప్రభుత్వం నుంచి రాష్ట్రానికి రావాల్సిన హక్కులు, సహకారం తదితర అంశాలపై అన్ని పార్టీల ఎంపీలతో రాష్ట్ర ప్రభుత్వం సమావేశం ఏర్పాటు చేసింది. బీజేపీ, బీఆర్ఎస్ సహా కాంగ్రెస్ ఎంపీలంతా హాజరయ్యే ఈ సమావేశాన్ని డిప్యూటీ సీఎం Bhatti నిర్వహిస్తున్నారు. పార్లమెంటు శీతాకాల సమావేశాలు డిసెంబరు 1 నుంచి ప్రారంభమవుతున్న నేపథ్యంలో రాష్ట్రానికి కేంద్రం నుంచి రావాల్సిన సహకారంపై లోతుగా చర్చించి సాధించుకోవడమే లక్ష్యంగా ఎంపీల అఖిలపక్ష సమావేశం జరుగుతున్నది. అన్ని పార్టీల ఎంపీలతో జరుగుతున్న ఈ సమావేశానికి ప్రాధాన్యత ఏర్పడింది. రాష్ట్రానికి రావాల్సిన అనుమతులు, హక్కుల విషయంలో పార్టీలకు అతీతంగా రాష్ట్ర అభివృద్ధే లక్ష్యంగా పనిచేయాలన్న సందేశాన్ని ఈ సమావేశం ద్వారా రాష్ట్ర ప్రభుత్వం ఇవ్వనున్నది.
కాంగ్రెస్ వ్యూహాత్మక ఎత్తుగడ :
రాష్ట్రం నుంచి ఎనిమిది మంది బీజేపీ ఎంపీలు గెలిచినా కేంద్రంపై ఒత్తిడి తీసుకొచ్చి రాష్ట్రానికి రావాల్సిన హక్కుల విషయంలో మౌనంగా ఉన్నారంటూ ముఖ్యమంత్రి రేవంత్ సహా మంత్రులు, బీఆర్ఎస్ నేతలు తరచూ విమర్శలు చేస్తున్న నేపథ్యంలో ఈ సమావేశం నిర్వహిస్తుండడం గమనార్హం. రాష్ట్ర అభివృద్ధికి కేంద్రం నుంచి సహకారం అనివార్యం కావడంతో ఆ చొరవ తీసుకోవాల్సిందిగా బీజేపీ ఎంపీలపై రాష్ట్ర సర్కార్ ఒత్తిడి పెంచుతున్నది. ఎనిమిది మంది బీజేపీ ఎంపీలలో ఇద్దరు కేంద్ర మంత్రులుగా ఉన్నందున వారి భుజాలపై తుపాకీ పెట్టి కేంద్రానికి కాంగ్రెస్ గురి పెట్టాలనుకుంటున్నది. రాజకీయాలకు తావు లేకుండా రాష్ట్ర అభివృద్ధే ప్రధాన ఎజెండాగా ఈ సమావేశంలో చర్చ జరగనున్నది. ఎంత మంది ఎంపీలు హాజరవుతారన్నది కీలకం.
వివాదాలకు ఫుల్ స్టాప్ పెట్టేలా… :
బీసీలకు స్థానిక సంస్థల్లో 42% రిజర్వేషన్ల అంశం, రాజ్యాంగ సవరణ అవసరం, ఏపీతో ఉన్న కృష్ణా జలాల వివాదం, పలు సాగునీటి ప్రాజెక్టులకు కేంద్ర జలశక్తి మంత్రిత్వశాఖ, కేంద్ర జల సంఘం నుంచి అనుమతుల మంజూరు, మూసీ నది పునరుజ్జీవనం, హైదరాబాద్ మెట్రో రైల్ విస్తరణ, రీజినల్ రింగ్ రైల్ నిర్మాణం, హైదరాబాద్-బెంగళూరు డిఫెన్స్ కారిడార్, డ్రై పోర్టు నిర్మాణం, రక్షణ శాఖ భూముల బదలాయింపు, ఫ్యూచర్ సిటీకి ఆర్థిక సహకార,.. ఇలాంటి అనేక అంశాలపై ఎంపీల సమావేశంలో చర్చ జరగనున్నది. పార్లమెంటు శీతాకాల సమావేశాల్లో కేంద్రంపై ఒత్తిడి పెంచాల్సిందిగా ఇప్పటికే కాంగ్రెస్ ఎంపీలకు దిశానిర్దేశం పూర్తయింది. ఇప్పుడు ప్రతిపక్ష బీజేపీ, బీఆర్ఎస్ ఎంపీలకు సైతం రాష్ట్ర అవసరాలను వివరించి కేంద్రం నుంచి సహకారం పొందడంపై చర్చించనున్నది.
Read Also: డిసెంబర్ 1 నుంచి రేవంత్ జిల్లాల పర్యటన
Follow Us on : Pinterest
