కలం, స్పోర్ట్స్: కోల్కతా నైట్ రైడర్స్ యువ సంచలనం అంగ్క్రిష్ రఘువంశీ (Angkrish Raghuvanshi) రాబోయే ఐపీఎల్ సీజన్లో కీలక పాత్ర పోషించడానికి సిద్ధమవుతున్నారు. 2025 సీజన్లో కేకేఆర్ జట్టు ఆశించిన స్థాయిలో రాణించకపోయినా, అంగ్క్రిష్ మాత్రం 11 ఇన్నింగ్స్ల్లో 300 పరుగులు చేసి అందరినీ ఆకట్టుకున్నారు. ఇప్పుడు ఐపీఎల్ 2026 దగ్గర పడుతున్న వేళ రఘువంశీ టాక్ ఆఫ్ ది నేషన్గా మారాడు. తాజాగా అతడు టీమిండియా కెప్టెన్ శుభ్మన్ గిల్, కోచ్ గౌతమ్ గంభీర్లపై ఆసక్తికర వ్యాఖ్యలు చేశాడు.
ప్రస్తుతం ప్రపంచ అత్యుత్తమ ఆటగాళ్లలో శుభ్మన్ గిల్ (Shubman Gill) ఒకరని అంగ్క్రిష్ కొనియాడారు. గిల్ ఇన్నింగ్స్ను నిర్మించే తీరు, భారీ పరుగులు చేయాలనే ఆయన కసి నుంచి తాను ఎంతో నేర్చుకున్నానని తెలిపారు. 2019లో అరంగేట్రం చేసినప్పటి నుండి గిల్ సాధించిన విజయాలు అద్భుతమని ఆయన పేర్కొన్నారు. మరోవైపు మాజీ మెంటర్ గౌతమ్ గంభీర్ గురించి మాట్లాడుతూ.. ఆయన కేవలం గెలుపు గురించి మాత్రమే ఆలోచిస్తారని అంగ్క్రిష్ వివరించారు.
సాధ్యమైనంత కష్టపడాలని, ఈ సీజన్ మనమే గెలవాలని గంభీర్ తనకు సూచించేవారని గుర్తు చేసుకున్నారు. గంభీర్ తీవ్రత మరియు గెలుపుపై ఆయనకున్న స్పష్టత తమను మెరుగైన ఆటగాళ్లుగా మార్చాయని ఆయన అభిప్రాయపడ్డారు.
గంభీర్ గెలుపు మంత్రం వల్లే కేకేఆర్ మూడుసార్లు టైటిల్ విజేతగా నిలిచిందని ఆయన వెల్లడించారు. ముంబై తరపున దేశవాళీ క్రికెట్ ఆడుతున్న 21 ఏళ్ల ఈ ఢిల్లీ ఆటగాడు, రాబోయే సీజన్లో కేకేఆర్ నమ్మదగ్గ బ్యాటర్గా ఎలా రాణిస్తారో చూడాలి. ఆటగాళ్ల కృషి, సీనియర్ల అనుభవం వెరసి జట్టు విజయాల్లో కీలక పాత్ర పోషిస్తాయని భావిస్తున్నారు.
