కలం డెస్క్ : ప్రస్తుతమున్న గ్రేటర్ హైదరాబాద్ మున్సిపల్ కార్పొరేషన్(GHMC) విస్తరణకు మంత్రివర్గం ఆమోదం తెలపడంతో దేశంలోనే అతి పెద్ద కార్పొరేషన్‌గా అవతరించనున్నది. ప్రస్తుతం సుమారు 650 చ.కి.మీ. విస్తీర్ణంతో 150 డివిజన్లుగా ఉన్న జీహెచ్ఎంసీ ఇకపైన దాదాపు 2,735 చ.కి.మీ. మేరకు విస్తరించనున్నది. మంత్రివర్గం తాజా నిర్ణయంతో జీహెచ్ఎంసీ పరిధిలో ప్రస్తుతం నివసిస్తున్న జనాభా 1.12 కోట్ల నుంచి రెండు కోట్లు దాటే అవకాశమున్నది. ఇరవై మున్సిపాలిటీలు, ఏడు మున్సిపల్ కార్పొరేషన్ల విలీనం ప్రతిపాదనతో మేడ్చల్ జిల్లా నుంచి సుమారు 1,085 చ.కి.మీ., రంగారెడ్డి జిల్లా నుంచి 700 చ.కి.మీ., సంగారెడ్డి జిల్లా నుంచి 300 చ.కి.మీ. చొప్పున జీహెచ్ఎంసీలో విలీనం కానున్నది. ఈ కొత్త ప్రతిపాదనతో దేశంలోనే అతి పెద్ద మున్సిపల్ కార్పొరేషన్‌గా GHMC అవతరించనున్నది. నిర్వహణ ఇబ్బందులను దృష్టిలో పెట్టుకుని భవిష్యత్తులో మూడు కార్పొరేషన్లుగా చేయాలనే ఆలోచన సైతం ప్రభుత్వ, అధికార వర్గాల్లో చర్చనీయాంశంగా ఉన్నది.
ప్రస్తుతం దేశంలోనే అతి పెద్ద మున్సిపల్ కార్పొరేషన్ ఢిల్లీ. గతంలో నార్త్, సౌత్, ఈస్ట్ మున్సిపల్ కార్పొరేషన్లుగా ఉన్న వ్యవస్థను సవరించి ఈ మూడింటినీ విలీనం చేసి 2022 మే నెలలో మున్సిపల్ కార్పొరేషన్ ఆఫ్ ఢిల్లీగా మార్చింది అప్పటి ప్రభుత్వం. దీంతో ఎంసీడీ, న్యూఢిల్లీ మున్సిపల్ కౌన్సిల్, ఢిల్లీ కంటోన్మెంట్ బోర్డులు మాత్రమే పనిచేస్తున్నాయి. ఎంసీడీ దాదాపు 1,440 చ.కి.మీ. విస్తీర్ణంలో రెండున్నర కోట్ల జనాభాకు సేవలందిస్తున్నది. ఆ తర్వాతి స్థానాల్లో బృహత్ బెంగళూరు (710 చ.కి.మీ.), ముంబై (440 చ.కి.మీ.), అహ్మదాబాద్ (465 చ.కి.మీ.), చెన్నై (425 చ.కి.మీ.)తో పనిచేస్తున్నాయి. ఇప్పుడు జీహెచ్ఎంసీలోకి 27 మున్సిపాలిటీలు, మున్సిపల్ కార్పొరేషన్లను విలీనం చేసి విస్తరించనుండడంతో ఢిల్లీ (ఎంసీడీ)కంటే పెద్ద మున్సిపల్ కార్పొరేషన్‌గా అవతరించనున్నది. జనాభారీత్యా చూస్తే మూడవ అతి పెద్ద కార్పొరేషన్ కానున్నది. ఆయా నగరాల విస్తీర్ణం (చ.కి.మీ.), జనాభా (కోట్లు) గణాంకాలను పరిశీలిస్తే…
నగరం విస్తీర్ణం జనాభా
హైదరాబాద్ 2,735 2.00
ఢిల్లీ 1,485 2.40
బెంగళూరు 710 1.20
అహ్మదాబాద్ 465 0.60
ముంబై 440 2.70
చైన్నై 430 0.80
కోల్‌కతా 210 0.65
Read Also: సోనియా ఇటలీ నుంచి ఇండియాకు ఎందుకొచ్చారు: ఎంఐఎం
Follow Us on: Youtube
