క‌లం, స్పోర్ట్స్: ఐపీఎల్ 2027 వేలానికి ముందు కోల్‌కతా నైట్ రైడర్స్ జట్టుకు కొత్త కెప్టెన్ ఎవరనే చర్చ మొదలైంది. వేలంలో సరైన కెప్టెన్ దొరక్కపోతే రింకూ సింగ్‌కు పగ్గాలు అప్పగించాలని మాజీ క్రికెటర్ ఆకాష్ చోప్రా (Aakash Chopra) సూచించారు. డిసెంబర్ 16న జరిగే వేలానికి ముందు జియోస్టార్ షోలో ఆయన మాట్లాడారు. గత సీజన్‌లో అజింక్య రహానే సారథ్యంలో మూడుసార్లు ఛాంపియన్ కేకేఆర్ ఏడో స్థానంలో నిలిచింది. తాజాగా రహానే రిటైర్మెంట్ ప్రకటించడంతో జట్టుకు కొత్త కెప్టెన్ అవసరమయ్యాడు. మరోవైపు కీలక విదేశీ ఆటగాళ్ల అందుబాటుపైనా జట్టులో ఆందోళన నెలకొంది.
వచ్చే ఏడాది వన్డే ప్రపంచకప్, యాషెస్ సిరీస్ ఉండటంతో కామెరూన్ గ్రీన్ ఆడటంపై సందేహాలు ఉన్నాయి. అందుకే రూ.25.2 కోట్ల విలువైన గ్రీన్‌ను వదిలేయాలని చోప్రా చెప్పారు. అవసరమైతే వేలంలో అతడిని సగం ధరకే తిరిగి కొనుగోలు చేయవచ్చని వివరించారు. అలాగే గాయాలతో మే నెల నుంచి ఆటకు దూరంగా ఉన్న మతీషా పతిరణను కూడా రిలీజ్ చేయాలని సూచించారు. రూ.18 కోట్ల పతిరణ, గ్రీన్‌లను వదిలేస్తే కేకేఆర్ పర్సులో రూ.43 కోట్లు మిగులుతాయని లెక్కగట్టారు.
దీనివల్ల వేలంలో అత్యధిక డబ్బుతో బరిలోకి దిగే జట్టుగా కేకేఆర్ నిలుస్తుందని పేర్కొన్నారు. ముస్తాఫిజుర్ రెహమాన్ అందుబాటుపై స్పష్టత లేకపోయినా, అతడు ఆడగలిగితే జట్టులోనే ఉంచుకోవాలని చోప్రా సలహా ఇచ్చారు. రూ.43 కోట్ల అదనపు నిధులు ఉంటాయి కాబట్టి అతడిని కొనసాగించడంలో ఇబ్బంది ఉండదని తెలిపారు.
కెప్టెన్సీకి రింకూ సింగ్ సరైన ఎంపిక అని ఆకాష్ చోప్రా విశ్వాసం వ్యక్తం చేశారు. ఈ ఏడాది యూపీ టీ20 లీగ్‌లో మీరట్ మావెరిక్స్‌ను ఛాంపియన్‌గా నిలిపిన అనుభవం రింకూకు ఉందని గుర్తుచేశారు. ఇప్పటికే వైస్ కెప్టెన్‌గా ఉన్న రింకూకు పూర్తిస్థాయి బాధ్యతలు ఇచ్చి పరీక్షించాలని సూచించారు. వేలంలో వేరే ఆప్షన్ దొరక్కపోతే విదేశీ ఆటగాళ్ల వైపు చూడకుండా రింకూ వైపే మొగ్గు చూపాలని అన్నారు.
